Takimet moderne, veçanërisht ato përmes aplikacioneve, shpesh janë një sfidë e vërtetë. Përveç fenomenit tashmë të njohur të “catfishing”, ku dikush krijon një profil të rremë në rrjetet sociale apo aplikacionet e takimeve, një trend i ri po ndikon negativisht tek përdoruesit: “bio-baiting”.
Ky është zakonisht rasti kur dikush e përshkruan veten në mënyrë tepër të zbukuruar në profil, me përshkrime që nuk përputhen me realitetin, me qëllimin për të ngjallur më shumë interes apo tërheqje.
Një sondazh i fundit me 1,500 beqarë, realizuar nga aplikacioni i takimeve Wisp, tregoi se 63% e tyre ndiheshin të zhgënjyer kur takonin dikë që nuk përputhej me përshkrimin e profilit të tij/saj. Ndër klishetë më të zakonshme që rezultuan mashtruese ishin:
“Më pëlqen të udhëtoj” (68%) dhe “Jam aventuresk” (51%), të ndjekura nga përshkrime si “sipërmarrës” (39%), “foodlover (njeri që do ushqimin)” (34%) dhe “spontan” (29%).
Sylvia Linzalone, eksperte për takime në Wisp, tha se këto praktika po çojnë drejt lodhjes nga aplikacionet e takimeve, pasi “zhgënjimi kur dikush nuk i përmbush pritshmëritë e profilit të tij e ul besimin dhe e bën gjithë procesin të ndihet i rremë dhe sipërfaqësor”.
“Mbrojtja më e mirë ndaj ‘bio-baiting’ është që biseda të kalojë sa më shpejt nga aplikacioni në jetën reale, për të shmangur pritshmëritë e tepruara dhe zhgënjimet”, thotë ajo.
“Bio-baiting” është vetëm një nga tendencat toksike të kohëve të fundit në botën e takimeve. Disa prej të tjerave përfshijnë:
Shrekking – kur dikush në mënyrë të qëllimshme ul vetëvlerësimin ose standardet e veta për të qenë në të njëjtin nivel me një partner më pak tërheqës, me shpresën se do të trajtohet më mirë.
Fshehja (hiding) – kur një person në një lidhje vendos ta “fshehë” partnerin nga miqtë apo familja. Edhe pse jo gjithmonë është një gjë e keqe, mund të jetë shenjë e pasigurisë ose mungesës së përkushtimit.
Ekspertët këshillojnë që, në vend që të përpiqeni të përshtateni me ndonjë nga këto trende, të jeni të sinqertë me veten dhe me personin që keni interes, pasi kjo është mënyra më e mirë për të ndërtuar një marrëdhënie të shëndetshme dhe të qëndrueshme.
