Foto: @kai fragrance/Pinterest

Jemi në muajin prilll dhe 2026-a po rezulton një vit shumë i mirë për parfumet. Nga rikthimi i parfumeve klastike te aromat më të reja me fruta dhe agrume, duket sikur këtë sezon ka diçka për çdo humor, çdo stil dhe çdo “version” tuajin.

Tani që ditët zgjaten dhe moti po ngrohet, është edhe momenti i duhur për të ndryshuar aromën që përdor. Diçka më e freskët, më e lehtë, që shkon me energjinë e pranverës. Edhe pse, nëse je tipi që nuk ndahet nga aromat e ngrohta dhe pak më të rënda, lajmi i mirë është që edhe këtë vit nuk mungojnë.

Ky vit sjell një ndërthurje shumë interesante: aroma të freskëta me agrume, lule të buta, por edhe nota më të thella si tonka, vanilje apo çaj. Për shembull, ka parfume që kombinojnë agrumet me nota të ëmbla, duke krijuar një ndjesi verore, por njëkohësisht elegante. Të tjerat janë më minimaliste, me aroma të buta që përshtaten me aromën e lëkurës.

Një trend është rikthimi i aromave me pjeshkë, që i japin parfumit një ndjesi të ëmbël, por jo të rëndë. Po ashtu, parfumet me çaj (matcha apo hojicha) po bëhen gjithnjë e më të preferuara, sidomos për ju që doni diçka më të sofistikuar.

Nga ana tjetër, nuk mungojnë as versionet e reja të parfumeve klasike, që këtë herë vijnë më moderne, më të lehta dhe më të përshtatshme për përdorim të përditshëm.

Ja disa nga fragrancat e reja të këtij viti:

Parfums de Marly Athenais 

E sugjerojmë për ju që preferoni aromat me agrume të freskëta të kombinuara me nota të ëmbla si vanilja dhe tonka. Ideal për mbrëmjet e verës, sidomos nëse kërkon një parfum që ndihet gjatë dhe lë gjurmë.

Creed Wild Vetiver 

Për ju që tërhiqeni nga aroma të freskëta me lule të lehta dhe një prekje pikante. Ideal për ditët kur do diçka të lehtë, por me karakter.

Chloe Sous Les Pins 

Një zgjedhje pak më ndryshe për ju që doni aromat natyrale. Të kujton një pemë pishe në bregdet, e freskët dhe qetësuese, me një prekje të lehtë eukalipti që i jep një ndjesi të pastër dhe verore.

Maison Margiela Replica Up At Dawn

Një aromë me lule të lehta, e frymëzuar nga kopshtet e qeta në fshat. Trëndafilat e butë dhe të freskët i japin një ndjesi romantike, ideale për përdorim të përditshëm kur do diçka elegante, por pa u rënduar.

Acqua di Parma Colonia Il Profumo Millesimato

Një zgjedhje e mirë nëse tërhiqesh nga aromat me agrume. Paçuli i jep thellësi dhe elegancë, që të mos ndihet shumë i lehtë. Si një verë italiane e mbyllur në një shishe.

Prada Les Infusions de Santal Chai 

Një aromë e ngrohtë dhe e butë, me nota çaji dhe kardamomi që të kujtojnë një pije të ëmbël e qetësuese. Prekja e lehtë e agrumeve e mban të freskët dhe të përshtatshme edhe për pranverë, ideale si për mbrëmje ashtu edhe për ditë në zyrë.

Carolina Herrera Good Girl Jasmine Absolute 

Një aromë që dallohet dhe zakonisht merr komplimente. Lulja e jaseminit kombinohet me nota të ëmbla si karameli dhe bajamet kremoze.

Lancôme’s Idôle Peach ’N Roses 

Një aromë për ju që doni nota me fruta dhe lule. Pjeshka i jep një ëmbëlsi të freskët trëndafilit, duke krijuar një ndjesi pranverore që të shoqëron gjatë gjithë ditës.

Tom Ford Taormina Orange 

Një aromë me agrume e fortë dhe e gjallë, që të kujton portokallet e pjekura dhe gjethet e gjelbra. Ideal për ditët e nxehta kur do diçka të freskët dhe me karakter.

BDK Velvet Tonka Extrait 

Një aromë e pasur dhe e thellë për ju që preferoni nota të ngrohta dhe të buta. Bajamet hapin aromën, ndërsa tonka dhe kremi i fëstëkut krijojnë një ndjesi elegante, që qëndron gjatë dhe përshtatet veçanërisht për mbrëmje.

Hermès Musc Pallida 

Një aromë e butë dhe e rafinuar, me nota të pastra që ndihen afër lëkurës. Irisi i jep një prekje pudre, ndërsa zambaku i luginës sjell freski dhe elegancë.