Conor McGregor

Conor McGregor ka humbur apelin në çështjen civile, ku akuzohet për sulm seksual, pasi Gjykata e Apelit në Dublin, Irlandë, e hodhi poshtë kërkesën që ai bëri këtë të enjte, 31 korrik. Trupa prej tre gjyqtarësh e refuzoi ankesën "në tërësinë e saj", sipas raportimeve të mediave irlandeze.

Rasti civil u ngrit nga Nikita Hand, e cila e paditi McGregorin për një ngjarje që, sipas saj, ndodhi pas një feste Krishtlindjesh në vitin 2018. Ajo pretendon se ylli i UFC-së e ka sulmuar seksualisht në një hotel në Dublin.

McGregor, i cili prej vitesh është një nga figurat më të famshme dhe kontraverse të sportit të arteve marciale, i ka mohuar kategorikisht akuzat. Megjithatë, në nëntor të vitit të kaluar, gjykata e shpalli fajtor për sulm seksual dhe urdhëroi që ai të paguante rreth 250,000 dollarë dëmshpërblim.

Pasi u shpall fajtor, McGregor apeloi vendimin në shkurt, duke deklaruar:

 "Drejtësia dhe e vërteta do të triumfojnë!"

Gjatë shpalljes së vendimit të Gjykatës së Apelit, Nikita Hand ishte e pranishme në sallën e gjyqit. McGregor nuk mori pjesë personalisht.

Ndërkohë, ish-kampioni i UFC-së ka kaluar pjesën më të madhe të kësaj vere në një jaht luksoz dhe është parë së fundmi duke pirë birrë në det, për të festuar faktin që njëri prej lokaleve të tij nuk u dëmtua nga një zjarr i fundit.

Deri më tani, ai nuk ka bërë asnjë koment publik për vendimin e fundit të gjykatës.