Të gjesh grupin tënd shoqëror mund të jetë e vështirë, sidomos në moshë madhore. Të krijosh miq të rinj është një sfidë më vete, por të gjesh një grup njerëzish që përshtaten mes tyre si personalitete, është një tjetër nivel më vete.
Alyssa Ferreone, avokate dhe modele me bazë në New York, ndau së fundmi në një video në TikTok "formulën" e saj për grupin e përkryer të shoqeve. Sipas saj, çdo grua në grup ka një rol të veçantë dhe të pazëvendësueshëm dhe kur këto lloj grash mblidhen bashkë, argëtimi është i garantuar.
1. Drejtoresha e Prokurimeve (The VP of Procurement)
Kjo është shoqja që është gjithmonë në lëvizje, gjithmonë në kërkim të aventurës së radhës. Ajo i njeh të gjithë, DJ, truprojat e deri tek organizatorët e eventeve. Me këtë shoqe pranë, "nuk paguan për ushqim, nuk paguan për pije, çdo gjë është e siguruar," thotë Ferreone.
Me pak fjalë, ajo është si Samantha Jones në "Sex and the City". Zakonisht ka energji të një shenje Zjarri ose Ajri dhe është thelbësore për një grup të balancuar.
2. Shefja e Logjistikës (The Chief Logistics Operator – CLO)
"Ndonëse VP e prokurimeve është ajo që sjell atmosferën, ajo nuk është organizatorja," shpjegon Ferreone. Ky rol i përket CLO-së, ose siç njihen zakonisht, "shoqja mami".
Ajo kujdeset për çdo detaj: kur duhet të ikim, si duhet të vishemi, kush nuk ka ngrënë ende, sa ka pirë kush. Pa të, udhëtimi i vajzave nuk do të dilte kurrë nga grupi në WhatsApp. Ajo rezervon biletat, gjen hotelet dhe ndan dhomat , një heroinë e padukshme, por e domosdoshme.
3. Drejtoresha Kreative (The Creative Director)
Kjo është ajo që ka syrin estetik. Planifikon veshjet, vendos si do të duken fotot, si do të rreshtohen ushqimet dhe pijet që gjithçka të duket perfekte për Instagram.
Kur bëni foto, është ajo që ju ndihmon të dukeni më bukur: "Lëvize këmbën, ktheje pak kokën…" – çdo detaj ka rëndësi. Me fjalë të tjera, ajo e bën çdo moment të duket si nga një shfaqje mode.
4. Koordinatorja e Vetëbesimit të Çmendur (The Delusion Affirmation Coordinator)
Çdo grup shoqëror ka nevojë për një dozë të mirë vetëbesimi dhe kjo shoqe është "motivi" kryesor. Ajo është shoqja që të frymëzon pa pushim dhe të jep energji pozitive.
"Ia mbush mendjen të gjithave që janë më të mrekullueshmet në botë," thotë Ferreone me humor, duke shtuar: "Ajo nuk planifikon, nuk drejton, por është gjithmonë e pranishme dhe e bindur që çdo natë do të jetë më e bukura e jetës suaj".
5. Shpërndarësja e Kaosit (The Distributor of Chaos)
E njohur ndryshe si "zhvillimi i papritur i historisë", kjo është ajo që gjithmonë e prish skenarin në mënyrën më zbavitëse të mundshme. Mban energji të shenjave si Dashi, Ujori apo Shigjetari.
"Ajo e bën gjithmonë për argëtim, jo me qëllim të keq," thotë Ferreone.
Është besnikja më e madhe e grupit, e gatshme të luftojë për mikeshat e saj, ndërsa organizon aventura që do të mbahen mend për vite.
