Preferencat seksuale, përfshirë kohën, mënyrën dhe personin me të cilin zgjedhim të kemi marrëdhënie, janë plotësisht personale. Megjithatë, një faktor që shumë njerëz nuk e marrin parasysh, por që mund të ndikojë në dëshirën për seks, është edhe dita e preferuar e javës.
Sipas një raporti të ri nga platforma e produkteve për të rritur Adam & Eve, dëshira seksuale mund të ndryshojë gjatë javës. Studimi sugjeron se ka ditë kur njerëzit ndihen më të prirur për intimitet dhe të tjera kur aktiviteti seksual bie ndjeshëm.
Raporti tregon se dita e mërkurë dhe e enjte janë ndër ditët kur njerëzit kanë më pak gjasa të bëjnë seks. Edhe pse studimi nuk jep një arsye të qartë për këtë fenomen, ekspertët mendojnë se lidhet me ritmin e jetës së përditshme.
Sipas seksologes Jenni Skyler, mesi i javës shpesh shoqërohet me nivele më të larta stresi dhe lodhjeje, për shkak të angazhimeve profesionale dhe detyrimeve të shumta. Kur presioni dhe mungesa e kohës arrijnë kulmin, dëshira për intimitet mund të ulet.
Megjithatë, ekspertët theksojnë se kjo situatë nuk është ideale për një marrëdhënie, pasi distanca emocionale mund të rritet nëse partnerët nuk gjejnë mënyra për t’u afruar.
Për këtë arsye, specialistët sugjerojnë disa mënyra të thjeshta për të ruajtur lidhjen me partnerin edhe në ditët më të lodhshme të javës. Intimiteti nuk duhet të lidhet domosdoshmërisht vetëm me seksin. Kalimi i kohës së bashku përmes aktiviteteve të përbashkëta, ndarja e hobive apo edhe një mbrëmje relaksuese mund të ndihmojë në forcimin e lidhjes.
Gjithashtu, elemente të vogla si një pije apo ushqim afrodiziak, përqafimet dhe përkëdheljet mund të krijojnë një atmosferë më intime dhe të rrisin gradualisht dëshirën për afërsi mes partnerëve.
Fundja, marrëdhëniet e shëndetshme ndërtohen jo vetëm mbi pasionin, por edhe mbi kohën dhe vëmendjen që partnerët i kushtojnë njëri-tjetrit.
