Arbana Osmani/ Instagram

Në një sesion të fundit me pyetje dhe përgjigje në Instagram, Arbana Osmani vendosi të flasë hapur për disa nga ndërhyrjet estetike që ka bërë, si botox-i në ballë, te rrudhat e syve dhe filler-i në buzë. Si gjithmonë, nuk mungoi pyetja as klasike, që mbart dhe nota gjykimi:

“A mendon se edhe rrudhat kanë lezetin e vet?”

Përgjigjja e Arbanës ishte shumë e qartë:

“Të them të drejtën, jo. Nuk mendoj që rrudhat kanë ndonjë ‘lezet’ dhe do kisha dashur që si unë, si mamaja ime, si gjyshja ime të mos kishim (pasur) rrudha.”

Arbana tregoi edhe një detaj personal ku tha se i lutet shpesh mamasë të bëjë botox, por ajo nuk pranon.

“I mban rrudhat e saj me shumë dinjitet dhe shumë mirë bën, por kjo është larg nga 'lezeti',” tha ajo, duke treguar se e çmon vendimin e mamasë, por nuk është se i jep asaj domosdoshmërisht ndonjë vlerë të shtuar.

Dhe për ata që e shohin këtë temë si diçka filozofike, Arbana shtoi se gjithë ky kujdes për pamjen është më shumë një mënyrë për të ruajtur veten nga presioni i padukshëm që ndiejmë të gjithë:

“Të gjithë duam të dukemi më të rinj. Tjetër gjë nëse pajtohesh me moshën dhe gjithçka që ajo sjell, ndoshta jeton më në paqe me veten. E shohim më shumë si një mekanizëm vetëmbrojtjeje nga nuk-e-di-se-kush.”

Pra, nëse herën tjetër dikush përpiqet t’ju bëjë moral për “bukurinë e rrudhave”, mos debatoni shumë gjatë. Thjesht tregojuni çfarë tha Arbana. Ka mjaftueshëm sinqeritet dhe sens praktik aty brenda.