Trump i bën thirrje Putinit të ndalë luftën në Ukrainë, jo të “testojë raketa”
Pas lajmeve për testin e suksesshëm të raketës bërthamore “Burevestnik” nga Moska, presidenti amerikan Donald Trump i bëri thirrje homologut të tij rus, Vladimir Putin, të përqendrohet në përfundimin e luftës kundër Ukrainës në vend që të “testojë raketa”.
“(Putini) duhet t’i japë fund luftës. Një luftë që duhej të kishte zgjatur vetëm një javë, tani po hyn në vitin e saj të katërt. Kjo është ajo që duhet të bëjë, jo të testojë raketa”, tha Trump të hënën.
Putin deklaroi të dielën se Rusia kishte testuar me sukses raketën e saj “unike” lundruese, të cilën Kremlini e përshkroi si pjesë të përpjekjeve për të “siguruar mbrojtjen kombëtare të vendit”.
Dhjetë persona përballen me gjyq në Francë për krim kibernetik ndaj Zonjës së Parë Brigitte Macron
Dhjetë persona dolën para gjykatës të hënën, të akuzuar për ngacmim kibernetik ndaj Zonjës së Parë të Francës, Brigitte Macron, pasi dyshohet se kanë përhapur një teori konspirative që pretendonte se ajo kishte lindur si mashkull dhe kishte marrë identitetin e vëllait të saj. Çdo i pandehur rrezikon deri në tre vjet burg dhe një gjobë prej 45,000 eurosh.
Sipas akuzës, ata kanë postuar komente fyese dhe kanë përhapur thashetheme të rreme për gjininë dhe seksualitetin e bashkëshortes së Presidentit Emmanuel Macron.
Zyra e prokurorisë së Parisit bëri të ditur se të pandehurit, tetë burra dhe dy gra, të moshës 41 deri në 60 vjeç, mes tyre mësues, profesionistë të IT-së dhe madje edhe zyrtarë lokalë, kishin shkuar aq larg sa ta krahasonin diferencën 24-vjeçare të moshës midis çiftit me “pedofili”.
Lituania planifikon të mbyllë kufirin me Bjellorusinë për shkak të balonave
Kryeministrja e Lituanisë, Inga Ruginien?, deklaroi të hënën se vendi i saj ka përgatitur plane për të mbyllur për një kohë të pacaktuar pikat kufitare me Bjellorusinë, pasi fluturimet në aeroportin e kryeqytetit janë ndërprerë disa herë për shkak të dyshimeve për balona që përdoren për kontrabandë cigare
Komisioni Kombëtar i Sigurisë së Lituanisë u mblodh pas disa raportimeve për balona, të cilat çuan në pezullimin e fluturimeve në aeroportin e Vilniusit për tre mbrëmje radhazi, të premten, të shtunën dhe të dielën, duke shkaktuar anulime, devijime dhe vonesa.
Edhe aeroporti i Kaunasit, që ndodhet më larg kufirit me Bjellorusinë, u ndikua nga këto ngjarje të njëjtën ditë.
Mbreti Charles përuron memorialin e parë kombëtar për ushtarakët LGBTQ+ në Mbretërinë e Bashkuar
Mbreti Charles përuroi të hënën memorialin e parë kombëtar të Mbretërisë së Bashkuar kushtuar ushtarakëve LGBTQ+, 25 vjet pasi vendi hoqi ndalimin ndaj homoseksualitetit në forcat e armatosura.
Monarku, që mban rolin ceremonial të komandantit të forcave të armatosura, vendosi lule pranë monumentit në Arboretumin Kombëtar të Kujtesës në Staffordshire, gjatë një ceremonie ku morën pjesë dhjetëra ushtarë aktivë dhe veteranë.
Skulptura ka formën e një letre të rrudhur prej bronzi, mbi të cilën janë gdhendur fjalë nga ushtarakë që u prekën drejtpërdrejt nga ndalimi.
