Një nga rikthimet më të papritura të sezonit? Xhaketa e hollë sportive, dikur simbol i praktikës dhe i thjeshtësisë, tani është shpallur si veshja zyrtare e vajzave që dinë si të bien në sy dhe kjo falë tri emrave që nuk bëjnë asnjë lëvizje pa u kthyer në trend: Hailey Bieber, Zoë Kravitz dhe Charli XCX.
Të tria vajzat u shfaqën në sfilatën e modës së Saint Laurent në Paris me veshje që kombinonin mëndafshin sensual me najlonin sportiv. Një përplasje stilesh që në fakt funksiononte kaq mirë!
Zoë Kravitz përqafoi një model me jakë të lartë dhe prerje të drejtë, ndërsa Bieber dhe Charli preferuan versione më të mëdha, me një frymë vintage, një miks i qartë mes estetikës së "babait" të viteve ’90-të dhe qasjes së vajzave moderne që guxojnë.
Ndryshe nga ç’mund të mendohet, për të ndjekur këtë trend nuk është e nevojshme një buxhet që konkurron sfilatat e Parisit. Modelet e propozuara përfshijnë xhaketa të shkurtuara me siluetë të lirshme, jakë të theksuar dhe ngjyra të lehta, perfekte për t’u kombinuar me funde, pantallona të gjera apo edhe veshje intime, nëse guximi është pjesë e stilit.
Ky rikthim i xhaketës së hollë sportive, dikur simbol i “pamjes për në palestër”, vjen si një përzierje mes nostalgjisë dhe nevojës për rehati me stil. Kur një pjesë veshjeje arrin të kalojë nga “praktike” në “ikone mode”, është e qartë që kemi të bëjmë me një moment të vërtetë kulture.
