Foto: @emmanuellek_; @ikilefevre/ Instagram

Mbyll sytë dhe imagjino vajzën më elegante franceze që ndjek në rrjete sociale. Çfarë ka veshur? Ndoshta një këmishë e lehtë që valëvitet me erën dhe një shall mëndafshi në kokë, ose një fustan me motive dhe shapka të thjeshta. Stili francez ka një identitet më vete, i rafinuar pa u përpjekur shumë. Lajmi i mirë? Nuk të duhet biletë për në Paris për ta kopjuar. Mjaftojnë disa pjesë kyçe verore dhe pak sens kombinimi.

Gratë franceze zakonisht zgjedhin bazat klasike të garderobës, ato që nuk dalin kurrë nga moda, në vend të trendeve kalimtare të internetit. Ato dinë të përziejnë motive, ngjyra dhe tekstura me një lehtësi që bie në sy sidomos në verë. Dhe po, janë mjeshtre edhe në shtresime dimërore, por asgjë nuk duket më bukur sesa një vajzë që ecën në rrugë me një fustan të lehtë dhe këpucë të thjeshta.

Me temperaturat në rritje, këto janë 7 kombinimet kryesore që po dominojnë stilin veror në Paris, bashkë me mënyrën si t’i veshësh:

1. Fustan me motive + shapka + triko e lehtë

Askush nuk i vesh fustanet me motive si francezet. Lule, pika apo printe të thjeshta, janë zgjedhja ideale sepse “bëjnë gjithë punën vetë”. Mjafton t’i shtosh shapka dhe një triko të hollë për një pamje tipike pariziene.

2. Shami mëndafshi + fustan neutral

Shamitë e mëndafshta janë detaj që ndryshon gjithçka. Edhe pse janë bërë trend kudo, francezet i kanë përdorur prej kohësh. Kombinoje me një fustan të thjeshtë, pa shumë detaje, lëre shaminë të jetë protagoniste.

3. Këmishë me vija + bikini + fund me dantellë

Kur nuk di çfarë të veshësh, një këmishë me vija është gjithmonë përgjigjja. Mund ta hedhësh sipër një bikini për plazh ose ta mbyllësh për një dalje. Një fund me dantellë i shton pak romantizëm gjithë pamjes.

4. Këpucë të sheshta të thurura + fustan i shkurtër + pallto e gjatë

Këto këpucë u bënë shumë të njohura verën e kaluar dhe vazhdojnë edhe këtë vit. I japin karakter edhe kombinimit më të thjeshtë: një fustan i shkurtër dhe një pallto e lehtë mbi supe.

5. Bluzë e bardhë + fund me motive + taka të ulëta

Një bluzë e bardhë klasike është themel i gardërobës franceze. Kombinoje me një fund me printe ose edhe me xhinse. Shto një palë taka të vogla për ta ngritur menjëherë nivelin e look-ut.

6. Pantallona të shkurtra sportive + kanotiere + këpucë me rrip pas

Pantallonat sportive janë surprizë stilistike dhe francezet i bëjnë të duken shumë “cool”. Sekreti? Kombinoji me një kanotiere të thjeshtë, këpucë elegante dhe një çantë lëkure.

7. Varëse me thekë + këmishë klasike

Varëset e gjata me thekë u rikthyen fuqishëm dhe do të vazhdojnë të shihen gjithandej. Vish një të tillë mbi një këmishë të thjeshtë ose bluzë, është detaji që e bën veshjen të duket e menduar.