Nicole Kidman dha edhe një herë një leksion të vërtetë elegance, duke zgjedhur një kostum tërësisht të zi për premierën e serialit të saj të ri televiziv, Scarpetta, në New York.

Aktorja u shfaq në Regal Union Square mbrëmjen e 3 marsit e veshur me një kostum nga Chanel, i përbërë nga një xhaketë oversize me kopsa gold, të cilën e kombinoi me një fund të zi transparent me detaje puplash. Pamjen e plotësoi me unaza argjendi, ndërsa flokët biondë i kishte stiluar me onde të lirshme, duke ruajtur stilin e saj klasik dhe minimalist.

“Mos u përgjigj për fëmijët e tu”

Në prag të premierës, fituesja e çmimit Oscar foli edhe për vajzat e saj, Sunday Rose dhe Faith Margaret. Ajo u shpreh se do të ishte shumë e lumtur nëse një ditë ato do të zgjidhnin ta ndiqnin në rrugën e saj profesionale, por vetëm nëse është dëshira e tyre.

“Një gjë që të gjithë dimë për fëmijët, sidomos kur rriten dhe bëhen gra të reja, është se ne nuk flasim në emër të tyre. Nuk u tregojmë të tjerëve kush janë apo çfarë janë. Janë ata që do t’ju tregojnë vetë kush janë. Duhet t’i pyesni ata.”

Megjithatë, ajo pranoi se do të donte “t’i kishte gjithmonë pranë”, duke i quajtur vajzat e saj “dashuritë e jetës”.

Në “Scarpetta”, Nicole Kidman interpreton Dr. Kay Scarpetta, një shkencëtare brilante mjeko-ligjore që përdor teknologji të avancuar për të zbardhur krime komplekse. Në serial luajnë gjithashtu Jamie Lee Curtis në rolin e Dorothy Farinelli dhe Ariana DeBose si Lucy Farinelli-Watson.

Në premierë, Kidman u fotografua krah Jamie Lee Curtis, e cila gjithashtu zgjodhi ngjyrën e zezë: një fustan elegant me dekolte dhe prerje të ngushtë që theksonte siluetën, i shoqëruar me një detaj në pjesën e ijeve.

Seriali “Scarpetta” do të ketë premierën në Amazon Prime Video më 11 mars.