Ju prezantojmë me rubrikën e re, Unpopular Opinion. Të gjitha kemi disa mendime që, nëse i themi me zë të lartë, na duket sikur do përfundojmë në burg. Jo sepse janë domosdoshmërisht të gabuara, por sepse janë…ndryshe. Nuk janë ato që shoqëria pret të dëgjojë, nuk janë të mbështetura nga masa dhe, mbi të gjitha, nuk janë të përshtatshme për t’u thënë në tavolinën e drekës me familjen. Këto janë ato mendime që i mbajmë për vete, i ndajmë vetëm me miqtë ose thjesht kafshojmë buzët për t’i mbajtur brenda. Unpopular opinions janë pikërisht ato mendime që shumica i konsideron të çuditshme, të guximshme ose thjesht të gabuara. Por jo çdo mendim që del jashtë rregullave është domosdoshmërisht i gabuar. Pra, ka ardhur koha të themi disa të vërteta jo aq të famshme.
?
"Kam menduar shpesh për këtë gjë, sidomos në ato momente kur më kap pasiguria. Ajo ndjesia kur shfletoj Instagramin dhe papritur më duket sikur jeta ime është e mërzitshme. Shikoj dikë me një trup perfekt në pushime luksoze, dikë tjetër me një gardërobë që duket sikur sapo ka dalë nga një revistë mode, një tjetër me lëkurë të përsosur, sikur nuk e ka njohur stresin kurrë në jetë. Dhe aty për aty, më fillon ai zëri në kokë: “Pse unë s’dukem kështu? Pse nuk e kam këtë jetë? Ku gabova?”
Pastaj, pa e kuptuar, lind prirja për të fajësuar ata që tregojnë këtë realitet. “Influencer-at po e prishin mendjen e njerëzve,” dëgjohet shpesh. “Po e rrisin pasigurinë kolektive.” Po a është vërtet kështu? Apo thjesht është më e lehtë të fajësohet dikush tjetër, sesa të pranohet që ky krahasim është i pakuptimtë?
Kur e mendova më mirë, kuptova që që kur isha fëmijë, standardet joreale të bukurisë dhe suksesit kanë qenë gjithmonë aty, vetëm se më parë vinin nga revista dhe televizioni. Më kujtohet kur fotot e Britney Spears bënin të besohej se çdo vajzë duhej të kishte një bel po aq të hollë dhe flokë që nuk elektrizoheshin kurrë. Dallimi është se atëherë nuk kishte një hapësirë për të shfryrë pakënaqësinë ndaj këtyre standardeve, ndaj gjithçka pranohej pa e vënë në dyshim.
Tani, me Instagramin dhe TikTok-un, gjithçka është më e prekshme dhe shfajësimi ka marrë një drejtim të ri: influencer-at. Por në thelb, ashtu si unë mendoj që edhe ju duhet të kuptoni që ato nuk kanë shpikur filtrat e bukurisë, as idenë se suksesi matet me luksin. Thjesht, ky realitet tashmë paraqitet më personal, më pranë, duke krijuar përshtypjen se gjithçka është e mundur për të gjithë – derisa vjen zhgënjimi.
Dhe pikërisht këtu qëndron dilema. Nëse një influencer poston një foto perfekte dhe lind një ndjesi pasigurie, problemi nuk është tek ajo. Është tek mënyra se si perceptohet vetja dhe bota përreth. Në fund të ditës, gjithçka varet nga zgjedhjet personale – se kë ndjek, çfarë përmbajtjeje konsumon, nëse krahasimi do të lejohet të ndikojë apo do të zëvendësohet me përqendrimin te vetja. Dhe nëse do të kishte një perfeksion të tillë, dëshira për ta ndarë me botën do të ishte e njëjtë.
Në këtë reflektim, fajësimi i influencer-ave duket si një rrugë e shkurtër për të shmangur një të vërtetë më të thellë: pasiguritë personale nuk burojnë nga një foto e kuruar me filtra, por nga mënyra si ndërtohet vetëbesimi dhe këndvështrimi mbi realitetin."- shkruar për Anabel nga një vajzë e sinqertë.
Shënim: Artikulli është përshtatur nga redaksia për qëllime editoriale dhe qartësie. Copyright Anabel.al / Ndalohet ribotimi pa lejen e redaksisë.
