Ke kaluar një ditë të keqe? U zgjove me një peshë mbi supe dhe nuk e di pse? Mendimet të thonë se gjithçka për të cilën ke punuar nuk ka asnjë vlerë? E pe veten në pasqyrë dhe të dukej sikur shihje një të huaj? Po të them diçka: të ndihesh kështu është shumë normale. Madje, do të ishte çudi nëse nuk do të kishe ditë të këqija.
Pse?
Sepse jemi njerëz. Trupi dhe mendja jonë janë krijuar për të përjetuar emocione të ndryshme. Nëse nuk do të kishim ulje-ngritje, do të ishim si ndonjë robot me programe të paracaktuara. Do të doje të ishe robot? Nuk besoj. Ndaj, që jemi këtu bashkë, duke kaluar një ditë të mërzitshme, le të kujtojmë disa gjëra që mund të na ndihmojnë ta përballojmë më lehtë.
1. Nuk do të zgjasë përgjithmonë
Edhe pse sot të duket sikur ke rënë në një gropë nga e cila nuk do të dalësh dot, mos i beso mendjes kur të thotë se kështu do të jetë gjithmonë. Do të dalësh prej saj. Do të vijë një moment kur do të ndihesh më i/e lehtë. Dielli do të shkëlqejë sërish. E garantoj.
2. Ke pasur ditë më të mira më parë
Mendo pak: A nuk ke pasur edhe më parë ditë kur je ndjerë mirë? Kur je parë në pasqyrë dhe ke menduar: “Po më pëlqen si dukem sot!”? Kur një i panjohur të ka buzëqeshur, kur qeni i komshiut ka tundur bishtin kur e ke përkëdhelur, kur një recetë e re të ka dalë perfekt dhe ke ndjerë një kënaqësi të vogël por të rëndësishme? E shikon? Këto ndjesi ekzistojnë dhe do të kthehen.
3. Emocionet janë si moti
Nuk jetojmë në një flluskë ku gjithçka është e njëjtë çdo ditë. Një ditë bie shi, një ditë del dielli, një ditë fryn erë dhe një ditë është vapë përvëluese. Po kështu funksionojnë edhe emocionet tona. Një ditë je e lumtur, një ditë je e mërzitur, një ditë e lodhur, një ditë e mbushur me energji. Çdo emocion vjen dhe ikën, ashtu si retë në qiell që, edhe pse duken të palëvizshme, janë gjithmonë në lëvizje.
4. A je në pikën ku mendon: “Unë nuk mundem më”?
Nëse po, po të them me siguri të plotë: Mundesh. Ndoshta nuk ndihesh kështu tani, ndoshta të duket sikur e ke shtrydhur çdo pikë energjie që kishe, por mos harro: e ke thënë edhe më parë këtë gjë dhe sërish ia ke dalë. Nuk është hera e parë që ndihesh kështu dhe nuk është hera e parë që ke për ta kaluar.
5. Nuk ke pse e përballon vetëm
Nëse ke një person të besuar, fol me të. Nëse s’ke fuqi të flasësh, shkruaj. Nëse nuk do të komunikosh me askënd, dëgjo një këngë që të bën të ndihesh më mirë ose shiko një video që të argëton. E rëndësishme është të mos i lësh mendimet e errëta të të mbysin. Ndonjëherë, edhe diçka e vogël mund të bëjë diferencën.
6. Edhe kjo do të kalojë
Pa marrë parasysh sa e rëndë të duket dita e sotme, një moment do të vijë kur do ta kujtosh këtë ndjenjë si diçka të largët. Një javë, një muaj apo një vit nga tani, do ta shohësh ndryshe. Mos harro: asnjë stuhi nuk ka zgjatur përgjithmonë.
Dhe kur kjo ditë të ketë kaluar, mos harro t’i thuash vetes: Ja dola edhe kësaj here.
Artikuj të sugjeruar:
