Të jemi të sinqertë - pastrimi nuk është puna më emocionuese në botë. Është e vështirë të krijosh një rutinë dhe akoma më e vështirë të qëndrosh i motivuar kur ka kaq shumë gjëra më argëtuese për të bërë. Në një ditë të ngarkuar, pastrimi është gjëja e fundit që të shkon ndërmend. Por fatkeqësisht, shtëpia nuk pastrohet vetë (ende nuk kemi dëgjuar për ndonjë zanë të pastrimit!).
E do një shtëpi të pastër, por ja që shpesh motivimi yt është në nivelin zero. Pse ndodh kjo? Ja disa arsye tipike:
Je i/e lodhur – Në fund të një dite (apo jave) të gjatë, pastrimi është minimumi që do të bësh.
Është shumë e lodhshme – Nuk e di nga t’ia fillosh dhe të duket sikur do të të marrë gjithë jetën.
Po pastron vetëm për të gjithë – Kur barra bie mbi ty, s’është çudi që humbet çdo motivim.
Sapo pastrove dhe u bë rrëmujë prapë – Sidomos me fëmijë ose kafshë shtëpiake, çdo përpjekje duket e kotë.
Nuk ke kohë – Mes angazhimeve të përditshme, pastrimi nuk është në listën e prioriteteve.
Nuk të pëlqen të pastrosh (ose nuk je i/e mirë në këtë punë) – Nuk është se e kemi të gjithë pasion pastrimin, apo jo?
Por sado pak dëshirë të kesh, shtëpia duhet pastruar. Ndaj, ja disa truke motivuese që ndihmojnë në situata të tilla!
Si të motivohet për të pastruar (kur nuk të bëhet aspak)?
1. Ndrysho mënyrën e të menduarit
Nëse e sheh pastrimin si një detyrë të mërzitshme, normal që nuk ke motivim. Por po ta shohësh si diçka që të bën të ndihesh më rehat dhe e bën shtëpinë më të këndshme, do e përballosh ndryshe. Kujto sa mirë do ndihesh kur gjithçka të jetë në rregull.
2. Fillo me diçka të vogël
Nëse mendon se duhet të pastrosh gjithë shtëpinë menjëherë, do ndihesh i/e demotivuar. Fillo me një hap të thjeshtë: mblidh librat, la enët, sistemo një cep të dhomës. Kur të shohësh që ke mbaruar diçka, do të ndihesh më i/e motivuar për të vazhduar.
3. Gjej momentin e duhur
Pastro kur ke më shumë energji. Nëse je tip mëngjesi, bëje sapo të zgjohesh dhe do kesh gjithë ditën për t’u marrë me gjëra të tjera. Nëse je më aktiv/e në darkë, lëre për më vonë. Zgjidh momentin që të përshtatet më shumë.
4. Krijo një rutinë
Në vend që të përpiqesh të pastrosh gjithçka për një ditë, ndaje në pjesë më të vogla. Vendos një orar dhe përdor një metodë si teknika e 25 minutave pastrim - 5-10 minuta pushim. Kjo të ndihmon të mos e shohësh pastrimin si diçka të lodhshme dhe të përqendrohesh më mirë.
Nuk ka rëndësi nëse fillon me hapa të vegjël apo bën një pastrim të thellë - gjëja më e rëndësishme është të fillosh. E kur të fillosh, do kuptosh që s’është dhe aq keq!
