Pas reagimeve të shumta mbi deklaratën e tij virale, Albi Lushi ka vendosur të sqarojë se gjithçka ishte “thjesht një batutë” dhe se ai nuk beson realisht se gratë “bëhen të lehta” pas konsumimit të alkoolit. Në një deklaratë të re për “Pa Manual” nga Andale, ai thotë:
“Unë nuk besoj se ju jeni nga ato vajza që duhet të pini alkool për t’u bërë të vështira apo të lehta. Nuk besoj se ka vajza ose djem të vështirë apo të lehtë. Unë besoj se ka vajza e djem që ndjejnë ose nuk ndjejnë, dashurojnë ose nuk dashurojnë. Njerëzit që më njohin nga afër e dinë që unë luaj me batutën.”
Pra, sipas tij, komenti që shkaktoi gjithë këtë debat ishte thjesht një shaka e momentit në një bisedë tavoline, e bërë për të argëtuar të pranishmit, pa e ditur që po regjistrohej.
Por, a është ky një justifikim i vlefshëm?
Nuk është hera e parë që deklarata të tilla “sqarohen” më vonë si shaka. Në fakt, kjo është një formulë e njohur: thuaj diçka problematike, prite reagimin e publikut dhe nëse del jashtë kontrollit, tërhiqe duke e cilësuar si humor. Në këtë rast, dilema është: a e ndryshon vërtet kuptimin e deklaratës fakti që ai nuk e dinte që po regjistrohej? Sepse, nëse ky ishte një mendim që ai ndau në një rreth të ngushtë situata është edhr më e keqe.
E vërteta është se një shaka nuk është gjithmonë e pafajshme. Një shaka për gratë dhe alkoolin, në një kontekst ku abuzimi dhe manipulimi emocional janë probleme reale, nuk është diçka që mund të kalohet me një “e keni keqkuptuar”. Në fund të fundit, humori nuk funksionon dot pa një ndjenjë përgjegjësie.
