Të gjithë zihemi herë pas here, por mënyra si përballemi me çdo debat na dallon nga njëri-tjetri. Reagimet tona në një konflikt tregojnë shumë edhe për të ardhmen e marrëdhënies. Profesori i psikologjisë dhe studiues i njohur i marrëdhënieve njerëzore dhe martesës, John Gottman, pas 40 vitesh eksperiencë, ka arritur në përfundimin se ka 4 faktorë që mund të çojnë çdo marrëdhënie drejt ndarjes.

Kritikat e vazhdueshme

Të gjithë ndonjëherë shprehim pakënaqësi për të metat e partnerit apo për diçka që na shqetëson. Problemi fillon kur ankesat kalojnë në kritikë të hapur. Është ndryshe të përqendrohesh te problemi dhe ndryshe të fajësosh personin tjetër. Kritika e vazhdueshme mund të bëhet një “litar” që shtrëngon marrëdhënien deri në këputje.

Mbrojtja e vazhdueshme

Shumica prej nesh, kur na tregojnë një gabim tonin, instinktivisht përpiqemi ta mohojmë ose të mbrohemi. Por nëse kjo bëhet mënyrë e vazhdueshme e reagimit, marrëdhënia nuk ka shumë shanse të mbijetojë. Kur një person mbron gjithmonë veten dhe nuk vetëpërmirësohet, patjetër që do mërzisë palën tjetër dhe do e detyrojë të marrë vendime drastike, si ndarja.

Përbuzja

Të gjithë kemi momente zemërimi dhe tensioni, por kur ky zemërim kthehet në përbuzje për partnerin, tregon se diçka shumë serioze po ndodh. Nënvlerësimi i personit tjetër dhe nënçmimi i sjelljes është oguri më i keq për një marrëdhënie.  Sipas hulumtimit të Gottman, është shkaku më serioz i divorcit. Qoftë e shprehur me fjalë apo me sjellje, synon të bëjë një person të ndihet inferior ndaj tjetrit, gjë që nuk mund të konsiderohet e shëndetshme për asnjë marrëdhënie.

Apatia

Ose e njohur ndryshe si “strategjia e shmangies së konfliktit”, e cila kur ndodh tregon se fundi është shumë afër. Apatia ndodh kur njëri nga dy partnerët qëndron i palëvizur dhe pa fjalë (si një mur) përballë një debati tjetër. Apatia tregon shkëputjen e plotë të një personi, refuzimin dhe distancimin nga marrëdhënia dhe partneri. Mund të jetë për shkak të negativitetit të vazhdueshëm të personit tjetër ose faktit që ata nuk kujdesen më për të ardhmen e marrëdhënies. Sipas të dhënave të profesorit, meshkujt kanë më shumë gjasa ta përvetësojnë këtë sjellje.

Burimi: Marie Claire