Vitet e fundit, vëmendja është përqendruar te introvertët, të cilët janë vlerësuar më shumë për thellësinë dhe reflektimin e tyre. Por edhe ekstrovertët, ata që marrin energji duke qenë pranë njerëzve, kanë vlera të jashtëzakonshme.

Shumë njerëz mund të identifikohen gabimisht si introvertë për shkak të lodhjes apo mbistimulimit, kur në fakt janë ekstrovertë që thjesht kanë nevojë për një pauzë.
Në realitet, ekzistojnë katër lloje të ndryshme të ekstrovertëve, dhe secili lloj ka një energji unike.

1. Ekstroverti ndjesor

Tony Stark: energjik, reagon shpejt dhe ka nevojë për stimulim konstant. Impulsiv, por i aftë të veprojë menjëherë dhe të kuptojë përmes përvojës.

Mendo për një ekstrovert ndjesor si një sfungjer: ai jeton në të tashmen dhe frymëzohet nga gjithçka dhe të gjithë përreth tij. Ekstrovertët ndjesorë lulëzojnë përmes aktivitetit fizik, përmes veprimit, dhe janë shumë të ndjeshëm ndaj mjedisit.

Ky lloj ekstroverti "gjallërohet" përmes përvojës direkte. Ata janë të përqendruar në të tashmen, reagojnë shpejt dhe lidhen me botën përmes lëvizjes, ndjesisë dhe reagimit në kohë reale. Ana negative është se ekstrovertët ndjesorë mund të gjykojnë shpejt dhe lodhen lehtësisht pa stimulim të jashtëm.

Çfarë këshillojnë terapeutët për ta:

Nëse je një ekstrovert që jeton në moment, "detyra" jote është të mësohesh të ngadalësosh ritmin, veçanërisht në lidhje me emocionet. Gëzohu plotësisht kur je i lumtur dhe lejoje veten të ndjesh trishtim kur ndihesh keq. Vëzhgo tendencën për të shmangur ndjenjat duke u marrë gjithmonë me diçka. 

2. Ekstroverti i ndjeshëm

Elle Woods: e ngrohtë, shprehëse dhe ka një aftësi të veçantë për të ndier dhe kuptuar ndjenjat e të tjerëve. Përpiqet të krijojë harmoni dhe kujdeset për mirëqenien emocionale e të gjithëve.

Një ekstrovert i ndjeshëm, apo empatik, është dikush që "ndriçon" kur të tjerët ndihen të kuptuar dhe emocionalisht të sigurt. Ata janë shprehës, të ngrohtë dhe shpesh janë "lidhësi" i komunitetit të tyre.

Këta persona emocionalisht të ndjeshëm përshtaten shpejt me dinamikat shoqërore, kuptojnë ndjenjat e të tjerëve dhe përpiqen për të krijuar harmoni në grup. Problemi është se shpesh mendojnë se është vetëm përgjegjësia e tyre të bëjnë që gjithçka të shkojë mirë ? duke lënë veten pas dore. Ky lloj ekstroverti ka tendencë për të kënaqur të tjerët, duke e skanuar vazhdimisht gjendjen emocionale të të tjerëve.

Çfarë këshillojnë terapeutët për ta:

Qëndro i lidhur me ndjenjat e tua; ajo që ti ke nevojë është po aq e rëndësishme sa nevojat e të tjerëve. Kontrollo veten përbrenda para se të thuash "po". Vendosja e kufijve nuk është mungesë dashurie, është kujdes për veten dhe respekt për marrëdhënien.

3. Ekstroverti intuitiv

Willy Wonka: krijues, i paparashikueshëm dhe i mbushur me ide origjinale. Flet për gjëra të mëdha dhe konceptuale, por shpesh i lë të tjerët të hutuar përpara se të lidhen pikat.

Ekstroverti intuitiv është tipi më krijues dhe novator: ata janë të shpejtë në ide, pëlqejnë të eksplorojnë mundësi dhe bëjnë lidhje të papritura mes temave.

Sado që u pëlqen të flasin, bëhet fjalë për ide të mëdha. Ata adhurojnë bisedat e thella dhe potencialin e situatave. Por, të kalosh nga një ide në tjetrën lë shumë gjëra përgjysmë.

Ekstrovertët intuitivë frymëzohen lehtësisht, ndonjëherë deri në mbingarkim.

Çfarë këshillojnë terapeutët për ta:

Detyra jote është të mësosh të çosh punët deri në fund. Ndonëse nisja e një projekti është emocionuese, përfundimi i tij sjell një ndjesi të fuqishme përmbushjeje. Vendos një strukturë dhe afate që në fillim, kur ke më shumë energji, dhe pastaj lejoje natyrën tënde krijuese të zhvillohet.

4. Ekstroverti mendimtar

Miranda Priestly: e përqendruar në rezultate, e drejtpërdrejtë dhe udhëheq me efikasitet. Vendos logjikën përpara emocioneve dhe është e qartë në qëllimet dhe vendimet e saj.

Ekstrovertët mendimtarë janë "rregulluesit" e grupeve: udhëhiqen nga logjika, efikasiteti dhe kërkojnë të vendosin rend përmes strukturës dhe veprimit. Ata fokusohen te rezultatet, jo te procesi apo emocionet, ndaj shpesh shihen si liderë ose zgjidhës problemesh.

Por, në kërkimin për zgjidhje, mund të duken të ftohtë ose shumë të drejtpërdrejtë. Këta persona shpesh perceptohen si shumë të prerë, pasi e vendosin mendjen para ndjenjave.

Çfarë këshillojnë terapeutët për ta:

Ndonëse qartësia jote është një forcë, është e rëndësishme të krijosh hapësirë për mirëkuptim. Mëso të dëgjosh pa u përgatitur menjëherë për t’u përgjigjur. Njerëzit ndonjëherë nuk kërkojnë një zgjidhje, por thjesht një praninë tënde dhe pak empati.

Artikuj të sugjeruar:

_{Burimi: HuffPost}