Foto: Nicki Minaj, SZA/ Instagram

Nëse menduat se vera do kalonte pa dramë në industrinë e muzikës, e keni gabim. Vetëm ditën e djeshme, Nicki Minaj ndezi rrjetin duke shpërthyer në një seri postimesh thumbuese ndaj këngëtares së hitit “Snooze”, SZA, duke i sulmuar gjithçka, nga muzika e deri te morali.

Gjithçka nisi kur Nicki Minaj akuzoi menaxherin e SZA-s dhe presidentin e label-it Top Dawg Entertainment, për “bullizëm” ndaj saj.

Edhe pse SZA nuk iu kundërpërgjigj drejtpërdrejt, një postim i saj në X ku shkruante "mos u ngatërro me karremat e internetit, o patë e vogël" u mor si një sulm për Nicki-n dhe kaq mjaftoi që kjo e fundit të shpërthente.

Nicki, siç e ka zakon, nuk i kurseu fjalët. Ajo i komentoi SZA-s:

“Shko vizato sërish qukat në fytyrë, bukuroshe,” dhe më tej shtoi se duket sikur është “pickuar nga bleta.”

Dhe nuk përfundon me kaq. Nicki sulmoi edhe karrierën muzikore të SZA, duke shkruar:

“Nëse çdo këngë që ke publikuar do zhdukej sot, industria muzikore nuk do e ndiente fare mungesën tënde. Kam qenë në vende ku njerëzit as që të kanë dëgjuar ndonjëherë.”

Ajo gjithashtu vuri në shënjestër albumin “SOS”, një nga më të suksesshmit e dekadës së fundit, që e bëri SZA-n artisten e parë me ngjyrë që ka qëndruar më gjatë në Top 10 të Billboard 200, duke thyer edhe rekordin e Michael Jackson-it me “Thriller”. Por për Nicki-n, suksesi i SZA nuk është “organik”.

“Po nxjerr një album të ri si version të zgjatur të atij që ka dalë para 2 vitesh vetëm për t’i dhënë një shtysë rekordeve. Çfarë mungese morali e integriteti është kjo?”

Më pas, SZA reagoi duke u shprehur se s’kishte asnjë qëllim për ta përfshirë Nicki-n në postimet e saj dhe se nuk po i drejtohej asaj. Por kjo nuk e ndaloi përplasjen me fansat e zjarrtë të Nicki-t, “Barbz”, që janë të njohur për lojën e ashpër në rrjet.

SZA e adresoi situatën me një deklaratë të re:

“Bullizohem çdo ditë nga miliona njerëz online dhe më pas dal në skenë në një skenë të mbushur me njerëz që më japin dashuri të vërtetë. Prindërit e mi janë mirë dhe unë jam në momentin më të suksesshëm të jetës sime.”

Aktualisht, SZA është në turne ndërkombëtar me Kendrick Lamar dhe po shijon suksesin më të madh të karrierës së saj deri më sot.