Tani e dimë se bukuria nuk ndalet kurrë së evoluari, çdo ditë lindin teknika, produkte dhe trende të reja.
Çdo vit, shfaqen prirje të reja që përshtaten me teknologjinë, duke prodhuar trajtime për mosha dhe lloje të ndryshme të lëkurës. Për këtë arsye, disa trende mund t’i përshtaten stilit tuaj, ndërsa të tjera jo.
Më poshtë kemi përmbledhur disa prej trendeve më të fundit, që janë preferuar më së shumti, secili për arsyet e veta unike.
1. Flokë kaçurrela pa përdorim nxehtësie
Kaçurrelat pa nxehtësi janë një zbulim i jashtëzakonshëm që ka fituar shumë popullaritet vitet e fundit. Siç tregon emri, ato krijohen pa përdorur fare nxehtësi, që do të thotë më pak dëmtim për flokët. Kjo metodë mund të realizohet me një rrip (po e quajmë kështu) sateni, ose edhe me çorape, zgjedhja është juaja!
Teknika është e thjeshtë dhe mund të realizohet sipas preferencave: mund t’i ndani flokët në mes dhe t’i mbështillni secilën anë rreth një rripi, ose mund të punoni me fijet një nga një. Rezultati? Flokë me volum, onde të bukura dhe pa dëmtuar flokët.
2. Krem mbrojtës me SPF për buzët
Ndonëse shumë njerëz kujdesen për mbrojtjen nga dielli për fytyrën apo trupin, shpesh harrojnë një nga zonat më të ndjeshme, buzët. Kremrat mbrojtës për buzë me SPF janë krijuar posaçërisht për t’i mbrojtur ato nga rrezet e dëmshme të diellit, njollat e errëta dhe tharja.
Shumë nga këto produkte janë njëkohësisht hidratuese dhe ushqyese, duke i dhënë buzëve një pamje të freskët, të butë dhe të shëndetshme çdo ditë.
3. Buzëkuqët gjysmë-mat
Pas dominimit të buzëkuqëve ultra-mat dhe shkëlqyesve intensivë, buzëkuqët gjysmë-mat vijnë si një e mesme e artë. Ata ofrojnë pamjen e rafinuar të buzëkuqit mat, por pa tharjen tipike, ndërkohë që kanë hidratimin dhe butësinë e një shkëlqyesi pa qenë ngjitës.
Formula e tyre është e lehtë dhe i jep një shkëlqim natyral buzëve, ideal për përditshmëri.
4. Parfume për flokë
Parfumet për flokë janë një tjetër trend që po fitojnë gjithnjë e më shumë terren. Të krijuara posaçërisht për flokët, ato kanë një aromë më të lehtë dhe përbërës që kujdesen për strukturën e flokut, si glicerinë apo aloe vera.
Përveçse japin një aromë të këndshme që zgjat, ato hidratojnë, ushqejnë dhe freskojnë flokët, duke neutralizuar aromat e padëshiruara.
5. Maskat LED për fytyrën
Terapia me dritë LED është një nga teknologjitë më moderne në kujdesin për lëkurën. Këto maska përdorin drita LED me valë të ndryshme për të përmirësuar elasticitetin, për të minimizuar rrudhat dhe për të ndihmuar në parandalimin e akneve.
Drita e kuqe, për shembull, stimulon prodhimin e kolagjenit dhe përmirëson pigmentin e lëkurës, duke e bërë atë të duket më e freskët dhe rinore. Maskat LED janë një investim për ata që duan një rutinë efektive dhe teknologjikisht të avancuar për kujdesin e lëkurës.
