Sezoni i tretë dhe i fundit i “Squid Game” ishte një nga serialet më të shumëpritura të vitit, por duket se jo gjithçka ka shkuar kaq vaj si me sezonet paraardhëse. Ajo që nisi si një histori e fuqishme sociale mbi mbijetesën dhe pabarazinë, për shumë fansa është mbyllur me një fund të çuditshëm, të zgjatur dhe emocionalisht bosh.
Shënim: Ky artikull përmban SPOILERS nga sezoni i tretë i “Squid Game”.
Kritikat kanë qenë të shumta dhe të ashpra në rrjete sociale, me shumë shikues që e krahasojnë finalen me fundin famëkeq të “Game of Thrones” – një tjetër serial që nuk u nda mirë me publikun.
Një nga momentet më të diskutueshme ishte “plani i bebes”: një fëmijë i vogël që rezulton fitues i lojës. Kjo është parë nga shumë si një vendim absurd, emocionalisht i detyruar dhe i pamotivuar narrativisht. Më keq akoma, bebja ishte krijuar me CGI, çka e bëri të dukej joreal dhe sipas disave, qesharak. Ky element, që duhej të ishte emocionalisht goditës, nuk rezultoi aspak i tillë.
Përveç kësaj, seriali u kritikua për ritmin e ngadaltë, zgjatjen e panevojshme të skenave dhe për personazhe të rinj që nuk arritën të lidhen me publikun. Disa ndjekës e përshkruajnë sezonin si “një justifikim për një spin-off amerikan (vazhdim i historisë së një personazhi)”, sidomos pas shfaqjes befasuese të Cate Blanchett në skenën finale, një moment që shumë e panë si një sinjal komercial, jo artistik.
Gjithsesi, ka edhe elementë pozitivë. Aktorët kryesorë Lee Jung-jae dhe Lee Byung-hun janë vlerësuar për interpretimet e tyre të qëndrueshme. Seriali nuk e ka braktisur plotësisht kritikën sociale ndaj kapitalizmit dhe pabarazisë ekstreme, element që e bëri të veçantë që në fillim.
Por, pavarësisht këtyre përpjekjeve, për shumë fansa, “Squid Game 3” dështoi të sjellë ndjenjat dhe tensionin që kishte sezonet e para.
“Squid Game” i ngriti shumë lart pritshmëritë, dhe pikërisht për këtë arsye, zhgënjimi është edhe më i madh. A ishte ky fundi që meritonte apo një tjetër shembull i një prodhimi që u zgjerua artificialisht për hir të famës? Për momentin, interneti ka vendosur të mos falë.
Burimet: The Guardian, India Times
