Nga shajet e lidhura si rrip, te fundet transparente dhe kombinimet me vija, ja si të vishesh me shtresa edhe në vapë, pa u dukur e rënduar.
Vera zakonisht nuk lidhet me veshjet me shtresa. Kur jashtë është vapë dhe mezi pret të bësh një dush të ftohtë në darkë, ideja për të shtuar më shumë rroba duket torturë. Por njerëzit që dinë të vishen me stil e dinë se një shtresë e lehtë mund ta bëjë një veshje verore shumë më interesante dhe elegante.
Nuk bëhet fjalë të veshësh pesë gjëra mbi njëra-tjetrën në 30 gradë. Sekreti është te kombinimet e zgjuara dhe materialet e lehta.
Ja disa truke që funksionojnë çdo verë:
Vija mbi vija
Kombinimi i vijave me vija është më “cool” nga sa duket. Një bluzë me vija poshtë një këmishe me vija më të holla, ose një shall me motive mbi një set me printime, e bëjnë veshjen më interesante. Sa më i papritur kombinimi, aq më stil duket.
Shallin lidhe në bel
Shalli i hollë i lidhur si rrip është një detaj i vogël që e transformon komplet pamjen. Mund ta lidhësh mbi pantallona lino apo një fustan minimalist dhe menjëherë dukesh sikur je menduar gjatë për veshjen, edhe kur s'je menduar.
Mbaj gjithmonë një triko të hollë me vete
Edhe në ditët më të nxehta, vjen një moment kur kondicioneri të ngrin ose darka freskohet. Një triko e hollë mbi supe ose e lidhur në bel jo vetëm ndihmon praktikisht, por i shton teksturë dhe stil kombinimit.
Fustani mbi pantallona rikthehet
Po, tingëllon si moda e viteve 2000, por këtë herë duket shumë më elegante. Fustanet e lehta mbi pantallona lino apo saten krijojnë një pamje moderne dhe të sofistikuar, jo si ato kombinimet e çuditshme të dikurshme.
Bluza bazike është sekreti
Një bluzë e thjeshtë poshtë një fustani apo nën një tjetër bluzë më të lirshme krijon menjëherë efekt “e stiluar”. Më e rëndësishmja është që shtresa poshtë të jetë e ngushtë dhe neutrale.
Fundi transparent, por i stiluar me zgjuarsi
Fundet transparente vazhdojnë të jenë trend, por tani fokusi është te mënyra si kombinohen. Mund të vishen me një fund të shkurtër poshtë, me pantallona të shkurtra ose edhe mbi një fustan minimalist. Ideja është të duket elegant, jo i ekzagjeruar.
