Një aplikacion me emrin Sileme, që do të thotë “A je gjallë?” në gjuhën kineze, është bërë viral në Kinë, duke shënuar një rritje të ndjeshme të shkarkimeve dhe reagimeve në rrjetet sociale.

Popullariteti i papritur e ka shtyrë kompaninë të vendosë një tarifë abonimi dhe të ndryshojë emrin për audiencën ndërkombëtare.

Aplikacioni, i cili u drejtohet personave që jetojnë vetëm, përshkruhet nga krijuesit e tij si “një mjet i thjeshtë sigurie për individët që jetojnë vetëm”, përfshirë studentë, punonjës zyrash apo persona të tjerë.

Ja si funksion: përdoruesi cakton një kontakt emergjence dhe aplikacioni dërgon njoftime automatike nëse përdoruesi nuk konfirmon praninë e tij në aplikacion për disa ditë rresht.

Kompania njoftoi në rrjetin social Weibo se në versionin e ri aplikacioni do të prezantohet me emrin Demumu. Ndërkohë, në Apple App Store, Demumu tashmë figuron me këtë emër dhe renditet në vendin e dytë në listën e aplikacioneve me pagesë.

Zhvilluesit kanë bërë të ditur se do të aplikojnë një tarifë prej 8 juanësh (rreth 40 lekë) për të mbuluar kostot në rritje, duke sqaruar se ekipi përbëhet nga tre të rinj të lindur pas vitit 1995, të cilët e kanë ndërtuar aplikacionin në mënyrë të pavarur.

Ndryshimi i emrit, megjithatë, nuk është pritur njësoj nga të gjithë përdoruesit. Disa në rrjetet sociale kanë kërkuar që emri origjinal të mos ndryshohet, ndërsa të tjerë kanë sugjeruar alternativa më “të buta” si “A je mirë?”, “A je online?” apo “A je aty?”.

Një përdorues shkroi se emri mund të jetë pak “i frikshëm”, por aplikacioni është i dobishëm për arsye sigurie dhe “i bën personat që jetojnë vetem që të ndihen më të qetë në jetën e përditshme”.