Dasma madhështore e multi-miliarderit të Amazon, Jeff Bezos, me partneren e tij prej vitesh Lauren Sánchez ka pushtuar titujt e mediave, por në Venecia është përballur edhe me valë protestash që po zgjasin gjatë të gjithë eventit tre-ditor.
Ndërkohë që çifti pritet të kurorëzojë dashurinë në ishullin San Giorgio, një kompleks monumental i projektuar nga arkitekti i shekullit XVI Andrea Palladio, qyteti historik është “pushtuar” nga personazhe mjaft të njohur, siguria e të cilëve po garantohet nga një sërë masash të rrepta sigurie.
Por jo të gjithë janë të entuziazmuar. Grupet protestuesish e shohin dasmën si simbol i pabarazisë së thelluar midis të pasurve dhe pjesës tjetër të shoqërisë. Një nga protestat më të spikatura ka përfshirë edhe një manekin të Bezos që noton nëpër kanalet e qytetit, duke ironizuar dasmën si një shfaqje arrogante të privilegjit.
Disa shifra rreth "dasmës së shekullit"
7-10 milionë dollarë është shumë e supozuar që po shpenzon çifti për tre ditë në Venecia, përfshirë akomodimin, sigurinë, eventet dhe menutë luksoze.
Lista e të ftuarve, rreth 200, përfshin emra të mëdhenj si Oprah ëinfrey, Kim Kardashian, Orlando Bloom (i ndarë së fundmi nga Katy Perry), Mbretëresha Rania e Jordanisë, Tom Brady, Ivanka Trump dhe Bill Gates.
90 avionë privatë pritet të ulen në aeroportet e Trevisos dhe Venecias gjatë fundjavës së dasmës.
Lauren Sánchez raportohet se do të veshë plot 27 veshje të ndryshme gjatë eventeve të dasmës, ndërsa veshjet janë të firmave si Oscar de la Renta dhe Dolce & Gabbana.
Menutë e dasmës janë mbajtur tërësisht sekret, megjithatë spekulohet se do të përfshijnë kuzhinierë me yje Michelin dhe çmime rreth 1,000 euro për person. Emrat që përmenden janë Massimo Bottura, Massimiliano Alajmo, familja Cerea e “Da Vittorio”-s dhe Enrico Bartolini.
Nga ana tjetër, banorët e qendrës historike të Venecias janë shprehur të pakënaqur me ndërhyrjen e një dasme kaq luksoze në jetën e tyre të përditshme.
“Nëse mund të marrësh me qira Venecian për dasmën tënde, atëherë mund të paguash edhe më shumë taksa.”
Kritikët i referohen praktikave të punës te Amazon, mosmarrëveshjeve të taksave me qeveritë evropiane dhe mbështetjes së Bezos ndaj Donald Trump si arsye për pakënaqësinë e tyre.
