Shqipëria është zyrtarisht në finalen e Eurovision 2026.
Alis Kallaçi, që përfaqëson vendin tonë me këngën “Nan”, arriti të kualifikohej në natën e dytë gjysmëfinale të festivalit europian, duke siguruar një vend në finalen e madhe të 16 majit në Vjenë.
Performanca e Alis u komentua gjerësisht në rrjet për intensitetin emocional dhe atmosferën dramatike që solli në skenë. “Nan”, një këngë me ngarkesë të fortë emocionale dhe elementë modernë të ndërthurur me identitetin shqiptar, duket se arriti të krijojë lidhjen e duhur me publikun europian.
Të shtunën, më 16 maj, Alis do të ngjitet sërish në skenën e Eurovision për të sjellë edhe një herë interpretimin e tij, në natën më të rëndësishme të festivalit.
Në finalen e madhe u kualifikuan edhe: Bullgaria, Ukraina, Australia, Rumania, Norvegjia, Malta, Qipro, Danimarka dhe Çekia, të cilat iu bashkuan vendeve të kualifikuara nga gjysmëfinalja e parë: Belgjika, Kroacia, Finlanda, Greqia, Izraeli, Lituania, Moldavia, Polonia, Serbia dhe Suedia.
Në finale do të jenë automatikisht edhe Austria si vend organizator, si edhe Franca, Gjermania, Italia dhe Mbretëria e Bashkuar, të cilat kualifikohen direkt për shkak të kontributit financiar në festival. Këtë vit, koncepti i “Big Five” u kthye praktikisht në “Big Four”, pas tërheqjes së Spanjës nga Eurovision 2026.
Finalja e madhe do të mbahet më 16 maj në Wiener Stadthalle, Vjenë.
