Tirana bëhet sërish pikëtakim i artit, muzikës dhe kulturave nga vende të ndryshme të botës. Nga 20 deri më 31 maj 2026, hapësira ikonike e instalacionit “Reja” do të kthehet në një skenë të hapur për publikun, duke mirëpritur edicionin e 10-të të CloudFest, i njohur edhe si Festivali i Resë.
Ky edicion jubilar shënon një dekadë rrugëtim artistik, energji publiku, bashkëpunime ndërkombëtare dhe përjetime kulturore në një nga hapësirat më të dashura të Tiranës. Nën drejtimin artistik të themelueses së festivalit, Edit Pula, Festivali i Resë rikthehet me një program të pasur, që ndërthur traditën me bashkëkohoren dhe sjell në kryeqytet artistë shqiptarë e ndërkombëtarë.
Këtë vit, udhëtimi artistik nis nga Shqipëria dhe Ballkani, për të kaluar më pas në ritmet e Mesdheut, Adriatikut, Meksikës, Skandinavisë, Norvegjisë dhe Gjermanisë. Artistë nga vende si Suedia, Italia, Gjermania, Kanadaja, Anglia, Norvegjia dhe Spanja do të mblidhen në Tiranë për të sjellë energjinë, stilin dhe kulturën e tyre në skenën e Resë.
Përgjatë 12 netëve, publiku do të ketë mundësinë të ndjekë performanca kërcimi bashkëkohor, koncerte narrative, performanca solo dhe instrumentale, muzikë live, ansamble, orkestra festive, banda dhe DJ ndërkombëtarë. Programi është konceptuar si një përvojë e gjallë dhe gjithëpërfshirëse, ku çdo mbrëmje sjell një atmosferë të re artistike.
Një pjesë e veçantë e këtij edicioni janë edhe workshopet e hapura të valleve shqiptare, përmes tyre, vizitorët vendas dhe turistët e huaj do të kenë mundësinë të bëhen pjesë aktive e festivalit, duke e përjetuar traditën shqiptare nga afër.
CloudFest mbetet besnik ndaj parimit të tij fillestar: art cilësor, i hapur dhe i aksesueshëm për të gjithë. Si çdo vit, festivali zhvillohet në qiell të hapur dhe është pa pagesë, duke e kthyer hapësirën e Resë në një nga pikat më të gjalla kulturore të Tiranës.
Festivali i Resë 2026 realizohet me mbështetjen e Bashkisë së Tiranës, Ministrisë së Turizmit, Kulturës dhe Sportit dhe Raiffeisen Invest.
