Foto: C-R-V/Shutterstock

Ka disa gjëra që italianët nuk i falin. Njëra prej tyre? Si e pi kafenë.

Nëse ke qenë ndonjëherë në Itali dhe je ulur qetësisht në një tavolinë për të shijuar kafenë, ka shumë gjasa që dikush ta ketë kuptuar menjëherë: nuk je vendas. Sepse për italianët, kafeja nuk është një ritual i gjatë, por një moment i shpejtë – zakonisht pihet në këmbë, te banaku.

Madje, në shumë raste, nëse ulesh në tavolinë, mund të paguash më shumë për të njëjtën kafe. 

Një tjetër gabim klasik? Të porosisësh latte. Në Itali, kjo do të thotë thjesht qumësht. Pra, nëse nuk e specifikon, mund të përfundosh me një gotë qumësht.

Edhe ora ka rëndësi. Cappuccino pas drekës? Italianët do ta vënë re menjëherë. Sipas tyre, pijet me qumësht janë për mëngjes dhe konsiderohen “të rënda” më vonë gjatë ditës.

Nëse do ta shijosh Italinë vërtet si një vendas, rregulli është i thjeshtë: espresso në çdo orë, cappuccino vetëm në mëngjes dhe gjithmonë, gjithmonë te banaku.

E marrim me mend edhe “shokun kulturor” që mund të përjetojnë kur vijnë në Shqipëri. Sepse këtu te ne, kafeja nuk pihet me nxitim, në këmbë jo e jo. Nëse duan ta përjetojnë si ne vendasit, duhet të përgatiten për një ritëm krejt tjetër: të ulen me qetësi, të porosisin pa nxitim dhe të bëjnë nja dy orë muhabet sepse kafeja është më shumë se një pije.