Të gjithë flasim për “pjekuri emocionale”, por si e kupton nëse e ke vërtet? Një psikologe jep 8 shenja konkrete që tregojnë nëse je në rrugën e duhur me veten.
Sot flitet shumë për inteligjencën emocionale dhe për mënyrën si komunikojmë apo reagojmë, por më pak për pjekurinë emocionale. Në thelb, ajo është aftësia për të qenë i qetë dhe i vetëdijshëm edhe kur situatat bëhen të vështira.
Sipas psikologes Nicole LePera, pjekuria emocionale nuk do të thotë që nuk mërzitesh apo nuk ndihesh keq. Do të thotë që i vëren ndjenjat e tua dhe zgjedh si të reagosh, në vend që të reagosh menjëherë.
Shumë nga reagimet tona të forta lidhen me përvoja të vjetra që i mbajmë në trup dhe në mendje. Kur diçka na kujton të kaluarën, reagojmë pa e menduar. Sipas saj, kjo pjekuri përfshin disa aftësi bazë, të qetësosh veten, të marrësh përgjegjësi për veprimet e tua, të pranosh ndjenjat pa e gjykuar veten dhe të kuptosh që sikleti nuk është gjithmonë i rrezikshëm.
8 shenja që tregojnë se je emocionalisht i pjekur
1. Ndalon para se të reagosh
Në vend që të flasësh menjëherë dhe të thuash diçka për të cilën mund të pendohesh, ndalon një moment, merr frymë dhe mendon. Ky ndalim i vogël mund të ndryshojë gjithçka.
2. Merr përgjegjësi pa e sulmuar veten
Mund të kërkosh falje pa e quajtur veten njeri të keq. Mëson nga gabimet.
3. Vendos kufij pa drama
Di të thuash “jo” pa qenë i pasjellshëm dhe pa u ndjerë në siklet. Shpreh qartë çfarë funksionon për ty.
4. Pranon që të tjerët mund të mendojnë ndryshe
Një mendim ndryshe nuk të prish punë. Nuk e merr gjithçka personale.
5. Rregullon marrëdhëniet pas një konflikti
Nuk do të thotë që nuk grindesh kurrë, por di të rikthehesh dhe të thuash “eja ta provojmë sërish”. Marrëdhëniet forcohen kur rregullohen.
6. I përballon ndjenjat, nuk i shmang
Në vend që të shpërqendrohesh vazhdimisht apo t’i shmangesh ndjenjave, qëndron me to derisa t’i kuptosh.
7. Heq dorë nga rolet e vjetra që nuk të shërbejnë më
Nuk ndihesh më i detyruar të jesh gjithmonë i fortë apo ai që zgjidh gjithçka. I lejon vetes të jesh thjesht njeri.
8. Zgjedh atë që është e mirë për ty, jo thjesht atë që të duket e njohur
Shpesh zgjedhim atë që na duket e njohur, edhe kur nuk na bën mirë. Pjekuria emocionale është të zgjedhësh atë që të ndihmon, jo vetëm atë që të duket familjare.
Si arrihet kjo pjekuri?
Sipas LePera-s, nuk ndodh me një moment të madh ndryshimi, por me hapa të vegjël të përditshëm. Të vëresh trupin, të marrësh frymë thellë, të flasësh me veten dhe të rregullosh marrëdhëniet kur diçka shkon keq. Gjërat e vogla, të përsëritura, i tregojnë trupit dhe mendjes që je i sigurt.
Dhe ndoshta më e rëndësishmja, nuk ke nevojë të rikthehesh te çdo kujtim i dhimbshëm për t’u shëruar. Shërimi ndodh në mënyrën si sillesh me veten sot. Qëllimi nuk është të jesh i përsosur.
