SHBA bombardon Iranin, Trump: “Një sukses spektakolar ushtarak”
Presidenti i SHBA-ve, Donald Trump e ka cilësuar bombardimin e tre objekteve bërthamore në Iran si një “sukses spektakolar ushtarak”.
Ai i bëri thirrje Iranit t’i rikthehet paqes, duke paralajmëruar se SHBA do të godasë objektiva të tjerë me “shpejtësi” dhe “saktësi”.
“Ose do të ketë paqe, ose do të ketë një tragjedi për Iranin, shumë më e madhe se ajo që kemi parë gjatë tetë ditëve të fundit,” tha Trump gjatë një fjalimi nga Shtëpia e Bardhë.
Sulmi amerikan erdhi disa javë pasi Izraeli goditi objektiva në Iran, ndërsa negociatat bërthamore mes SHBA-së dhe Iranit ishin ende në vazhdim.
Garda Revolucionare e Iranit: “Lufta sapo filloi”
“Lufta fillon tani,” deklaroi Garda Revolucionare Islamike e Iranit (IRGC) natën e së dielës, pas goditjeve ajrore amerikane në tri objekte bërthamore në Iran, sipas deklaratës së presidentit Trump.
Në një postim në rrjetin Truth Social, Trump konfirmoi se “një ngarkesë e plotë bombash” u hodh mbi objektet bërthamore të Fordow, Natanz dhe Esfahanit.
Megjithatë, ndërhyrja e SHBA-së mund të sjellë një tjetër përshkallëzim, referuar edhe deklaratës së Gardës Revolucionare.
Kriza në Lindjen e Mesme po trondit ekonominë globale
Rritja e çmimeve të energjisë në Europë është një nga shumë rreziqet e krizës aktuale gjeopolitike, e cila kërcënon të bllokojë një nga rrugët më të rëndësishme të transportit të karburanteve në botë. E kombinuar me luftën tregtare të shkaktuar nga tarifat amerikane, kjo krizë po shton frikën për një ngadalësim të ekonomisë globale.
Banka Botërore parashikon një rritje ekonomike prej vetëm 2.3% për këtë vit, në krahasim me 2.8% në vitin 2024.
Që nga sulmet ajrore të Izraelit ndaj infrastrukturës ushtarake dhe bërthamore të Iranit më 13 qershor, çmimet e naftës janë rritur me mbi 10% në nivel global. Çmimet e larta dhe ndërprerjet e furnizimit, të kombinuara me efektet e luftës tregtare, po kërcënojnë prodhimin global.
Rusia godet Ukrainën me 280 dronë dhe raketa
Rusia ka lëshuar 280 dronë dhe raketa drejt Ukrainës gjatë një sulmi të fundit gjatë natës së shtunë, prej të cilave 260 janë neutralizuar, sipas Forcave të Armatosura të Ukrainës.
Qyteti i Kremenchukut në rajonin e Poltavës ishte objektivi kryesor i këtij sulmi ajror, sipas ushtrisë ukrainase.
Kreu në detyrë i administratës ushtarake të Poltavës, Volodymyr Kohut, raportoi se goditjet direkte dhe mbetjet e raketave kanë dëmtuar infrastrukturën energjetike, si dhe banesa private, pallate, apo automjete.
