Armëpushimi mes Izraelit dhe Iranit: Trump kritikon dy shtetet
Mëngjesi i së martës nisi me paqartësi të madhe rreth kohës së hyrjes në fuqi të marrëveshjes për armëpushim, e shpallur për herë të parë nga presidenti amerikan Donald Trump.
Vetëm disa orë më pas, ministri izraelit i Mbrojtjes akuzoi Iranin për shkelje të marrëveshjes dhe paralajmëroi një kundërpërgjigje ushtarake, menjëherë pasi Irani lëshoi dy raketa drejt Izraelit, duke pretenduar se shkeli armëpushimin.
Qeveria izraelite bëri të ditur se kishte pranuar marrëveshjen për armëpushim të martën në mëngjes, disa orë pasi të dy vendet shkëmbyen sulme të ashpra gjatë natës.
Kjo situatë solli edhe reagimin e Donald Trump, i cili nuk e fshehu revoltën ndaj dy vendeve, duke thënë se as Izraeli dhe as Irani nuk e dinë se ç’po bëjnë.
Presidenti iranian shpall përfundimin e luftës 12-ditore
Presidenti iranian, Masud Pezeshkian, njoftoi “përfundimin e luftës 12-ditore të nxitur” nga Izraeli, në një mesazh drejtuar kombit, të publikuar nga agjencia shtetërore e lajmeve IRNA.
“Sot, pas rezistencës heroike të kombit tonë të madh, që po shkruan historinë me vendosmërinë e tij, ne jemi dëshmitarë të vendosjes së armëpushimit dhe përfundimit të kësaj lufte 12-ditore, të nxitur nga aventurat dhe provokimet izraelite,” shkroi Pezeshkian.
Më herët, presidenti iranian shprehu gatishmërinë e vendit të tij për të “zgjidhur problemet” me Shtetet e Bashkuara të Amerikës.
Gjeorgjia arreston figurat kyçe të opozitës, përshkallëzohen protestat
Autoritetet në Gjeorgji kanë arrestuar katër figura të rëndësishme të opozitës brenda pak ditësh, si pjesë e një goditjeje ndaj kundërshtarëve pas zgjedhjeve të kontestuara të tetorit të kaluar.
Pothuajse të gjithë liderët e opozitës pro-perëndimorë në Gjeorgji tani ndodhen në burg, ndërkohë që protestat kundër partisë në pushtet vazhdojnë çdo ditë në kryeqytetin Tbilisi.
Protestuesit pretendojnë se votimi i 26 tetorit, që i dha partisë Ëndrra Gjeorgjiane një mandat të ri qeverisës, nuk ishte i lirë dhe i ndershëm.
Sanksionet e BE-së ndaj Rusisë përballen me pengesa politike
Paketa më e fundit e Bashkimit Europian për sanksione ndaj Rusisë ka hasur në pengesa politike pak ditë para takimit të 27 liderëve të bllokut, duke hedhur dyshime mbi kohën dhe mënyrën e miratimit të kufizimeve ekonomike.
Pengesat kanë të bëjë me çmimin tavan për naftën bruto që Rusia eksporton me anije, të cilin Komisioni Europian propozoi ta ulë nga 60 në 45 dollarë për fuçi, në përpjekje për të reduktuar të ardhurat energjetike të Kremlinit, që financojnë pushtimin e Ukrainës.
Ndryshe nga sanksionet e tjera, ky mekanizëm u hartua dhe u miratua në nivelin e G7-ës dhe në bashkëpunim të ngushtë me Shtetet e Bashkuara. Megjithatë, kur liderët e G7 u mblodhën javën e kaluar në Kanada për takimin e tyre vjetor, nuk pati asnjë shenjë që Donald Trump, i cili u largua një ditë më herët, ishte në favor të këtij ndryshimi.
