Në një nga sfidat e “Ferma VIP 3”, ku fermerët duhet t'u përgjigjeshin disa pyetjeve përmes një loje me letra, një përgjigje e Mimoza Ahmetit ka ngjallur reagime në rrjet.
Në tavolinë ndodheshin Moza, Sara dhe Gresa, kur kësaj të parës iu drejtua pyetja: të përmendte një koleg apo kolege që, sipas saj, nuk e meriton suksesin që ka.
Përgjigjja e Mozës ishte e drejtpërdrejtë:
“Po them për Ismail Kadarenë që e kam koleg në fushën time, ai nuk e meriton gjithë atë sukses që ka.”
Ndonëse për fermeret e tjera aty pranë kjo përgjigje nuk ngjalli kuriozitet, videoja është bërë virale dhe njerëzit po komentojnë mendimin e shkrimtares. Komentet më të pëlqyera janë ato të njerëzve të cilët bien në një mendje me Mozën, duke shprehur se gjithashtu mendojnë njësoj si ajo.
View this post on Instagram
Rasti e donte që kolegët të vlerësonin kolegët për punën e tyre, gjë të cilën Moza e bëri, por pa pasur mundësinë ta shtjellojë mendimin. Komentet mbështetëse (me siguri nga jokolegë) megjithatë, hapën një debat që prej dekadash ekziston lidhur me Ismail Kadarenë, i cili ka qenë shpesh figurë kontroverse.
Përtej suksesit letrar, debati mbi raportin e Kadaresë me regjimin komunist në Shqipëri ka ekzistuar prej kohësh. Një pjesë e kritikëve e kanë parë si një autor që arriti të mbijetonte artistikisht brenda sistemit, ndërsa të tjerë kanë ngritur pyetje për afërsinë që pati me regjimin e kohës. Edhe ndër komentuesit e videos së mësipërme, nuk kanë munguar komente që lidhen pikërisht me këtë pjesë.
Megjithatë, Ismail Kadare mbetet figura më e njohur e letërsisë shqiptare në botë, veprat e të cilit janë përkthyer në dhjetëra gjuhë. Romanet e tij studiohen në universitete europiane dhe prej vitesh emri i tij është lidhur vazhdimisht me diskutimet për Çmimin Nobel në Letërsi. Për shumëkënd, Ismail Kadare është emri që e nxori letërsinë shqipe jashtë kufijve të Shqipërisë.
