Dikur, streçet konsideroheshin si rroba vetëm për rehati, njësoj si tutat, por kjo ka ndryshuar totalisht. Falë Rihanna-s, ato janë kthyer në pjesë fashion-i dhe madje kanë “hyrë” edhe në Paris, qytetin e stilit më elegant. Së fundmi, ajo u pa në një nga restorantet e saj të preferuara luksoze, e veshur me streçe dhe jo çfarëdo look-u.
Rihanna kishte zgjedhur streçe me prerje të hapur poshtë, të kombinuara me taka të kuqe me lidhëse nga Alaïa, një kombinim jo i zakonshëm, por shumë i goditur. Pikërisht prerja e hapur te streçet i nxjerr në pah këpucët, duke i bërë perfekte për t’u veshur me taka, ndryshe nga modelet sportive. Për më tepër, këto streçe kanë një siluetë më të gjatë dhe më elegante, ndaj funksionojnë edhe për dalje në darkë, jo vetëm për ditë casual.
Si gjithmonë, stili i saj ishte i goditur: xhaketë me kuadrate me jakë të lartë, një shtresë me gëzof sipër dhe syze të mëdha aviator. Me pak fjalë, një look që duket pa mundim dhe i bukur, tipik Rihanna.
Ideja kryesore? Nëse ke streçe me prerje poshtë, provoji me taka sepse rezultati është shumë më i bukur sesa mendon.
