Rikthimi i shumëpritur i filmit The Devil Wears Prada ka sjellë sërish në vëmendje jo vetëm historinë ikonike të modës, por edhe detajet që dikur na dukeshin “normale” dhe sot tingëllojnë krejt ndryshe, sidomos kur bëhet fjalë për çmimet.

“Po i vesh…?” “Çizmet Chanel? Po, po i vesh.” Kjo frazë ikonike shënoi një nga momentet kur Andy Sachs hyri më thellë në botën e modës, duke lënë pas stilin e saj të zakonshëm. Çizmet në fjalë kushtonin rreth 1,500 dollarë në atë kohë. Sot, ato konsiderohen një vintage dhe mund të shiten mbi 4,000 dollarë, një rritje që tregon sa shumë ka ndryshuar tregu.

Me rastin e premierës së vazhdimit të filmit, revista The Cut bëri një përllogaritje interesante: sa do të kushtonin sot disa nga “shpenzimet” e personazheve.

Dhe rezultati? Moda e “Runway” nuk ka qenë kurrë më e shtrenjtë.

Edhe detajet e jetës së përditshme në film tregojnë shumë për ndryshimin e kohërave. Vajzat binjake të Miranda Priestly ndiqnin një nga shkollat më elitare në New York, me një tarifë prej 35,000 dollarësh në vit në 2006-ën. Sot, e njëjta shkollë do të kushtonte rreth 67,000 dollarë, pothuajse dyfish.

Ndërkohë, dreka e famshme e Mirandës, një biftek i porositur me një indiferencë tipike për karakterin e saj, ka kaluar nga 50 dollarë në rreth 82 dollarë sot. Edhe kafeja e saj e përditshme nuk i ka shpëtuar inflacionit: nga 3 dollarë atëherë, në rreth 6.50 dollarë sot.

Një tjetër moment i paharrueshëm ishte “debati” për bukën me djathë të përgatitur nga Nate për Andyn. Djathi Jarlsberg që kushtonte 8 dollarë për një sasi të bollshme, sot do të blinte pothuajse gjysmën e asaj sasie, një detaj i vogël që flet shumë për ndryshimin e kostos së jetesës.

Sigurisht, kur bëhet fjalë për modën e luksit, disa gjëra mbeten të pandryshuara: gjithmonë të shtrenjta. Xhaketa elegante Chanel e Andyt kushtonte mbi 5,600 dollarë në atë kohë dhe sot shkon në rreth 6,700 dollarë, ende jashtë mundësive të një asistenteje të re në një revistë mode.

Megjithatë, jo çdo gjë është bërë më e paarritshme. Çanta blu prej lëkure nga Marc Jacobs, që dikur kushtonte 1,900 dollarë, sot mund të gjendet në tregun e 'second hand' për rreth 150 dollarë. Një kujtesë se moda, si çdo gjë tjetër, kalon në cikle, dhe ndonjëherë, luksin mund ta gjesh aty ku nuk e pret.