Zayn Malik ka publikuar në Instagram një pjesë të këngës së tij të re “Fuchsia Sea”, në të cilën aludon se është përballur me racizëm, ndërsa ishte pjesë e një grupi me njerëz “të bardhë”, referuar ngjyrës së lëkurës.
“Unë kam qenë i vetëdijshëm për çdo nëntekst/ Ndërsa ata përqendrohen te rritja e tyre/ Unë kam një biletë vajtje-ardhje për tek yjet/ Punova fort në një grup (me njerëz) të bardhë dhe ata qeshën me aziatikun”, shprehet këngëtari.
Zayn, 32 vjeç, babai i të cilit është pakistanez dhe nëna me prejardhje angleze dhe irlandeze, tha ndër të tjera se kënga do të publikohet së shpejti. Fansat nuk e fshehën entuziazmin dhe mezi presin të zbulojnë se për çfarë e ka fjalën specifikisht Zayn Malik në këngën e tij.
Megjithatë, njerëzit janë të bindur se ai i referohet pikërisht pjesëmarrjes në One Direction, grupit të krijuar në vitin 2010 nga Zayn Malik, Harry Styles, Louis Tomlinson, Niall Horan dhe Liam Payne, i cili ndërroi jetë vitin e kaluar. Të pestë anëtarët e grupit britanik u paraqitën fillimisht si konkurrentë të veçantë në “X Factor” përpara se të bashkoheshin nga juria: Simon Cowell, Nicole Scherzinger dhe Louis Walsh.
Zayn njoftoi largimin nga grupi në vitin 2015. Pjesa tjetër e grupit hyri në një pauzë të pacaktuar vitin pasues dhe secili ndoqi karrierën solo. Para vdekjes së Liam, Harry kishte lënë të kuptohej se grupi mund të ribashkohej gjatë një interviste në “The Late Late Show” në prill 2023.
“Po apo jo, a do të ketë një ribashkim të One Direction? A do të ndodhë ndonjëherë?” pyeti moderatori James Corden.
Harry u përgjigj asokohe: “Kam frikë se nuk është një pyetje që merr vetëm ‘po’ ose ‘jo’. Nuk do të thoja kurrë 'kurrë'. Nëse do të vinte një moment që të gjithë do ta donim, nuk shoh ndonjë arsye pse jo”.
Një burim gjithashtu i tha Us Weekly në dhjetor 2024 se grupi ishte “në bisedime për të mbajtur një koncert të fundit bashkë” përpara vdekjes së Payne.
Ndërkohë, Zayn Malik ka nisur të rikthehet ngadalë në vëmendje pas një periudhe të tërhequr nga publiku që pas ndarjes me modelen Gigi Hadid në vitin 2021, me të cilën ka një vajzë 4-vjeçare, Khai.
