Prej kohësh është përfolur se raporti mes Dafina Zeqirit dhe motrës së saj të vogël nuk është edhe aq i afërt, por së fundmi, ka ardhur një reagim i drejtpërdrejtë nga vetë kjo e fundit, Besa Tafari.
E ftuar në Prive by Liberta Spahiu, Besa foli hapur për marrëdhënien me Dafinën, duke i dhënë fund aludimeve. Ajo u shpreh pa hezitim për lidhjen e fortë që kanë mes tyre:
“E respektoj dhe e dua motrën time shumë dhe do ta bëj gjithmonë. Nëse marr një telefonatë nesër ku dikush më thotë ‘dëgjo, motrës tënde i duhet një veshkë’, unë jam aty për t'i dhënë timen. Sepse në fund të fundit kemi 10 muaj diferencë, jemi si binjake.”
Megjithatë, një detaj që ka nxitur gjithmonë dyshime është fakti që dy motrat nuk ndiqen në rrjetet sociale, gjë që mund të interpretohet si distancë mes tyre.
Prania e Besës në dasmën e Dafinës 2 vite më parë, megjithatë, riktheu sërish vëmendjen mbi raportin e tyre, duke lënë të kuptohet se motrat mund të kenë lënë pas çdo hatërmbetje që mund të ketë ekzistuar mes tyre për atë ditë të rëndësishme.
Besa, e cila është modele, këngëtare dhe tekstshkruese dhe ka jetuar mes Zvicrës dhe Shteteve të Bashkuara, la të kuptohej se distanca fizike mund të ketë qenë arsyeja pse nuk i kemi parë shpesh bashkë:
“Edhe pse kemi qenë larg dhe në rrugë të ndryshme në jetët tona, unë kam qenë duke bërë modeling dhe me një jetë shumë të ngarkuar, ku realisht jetoja nëpër avionë, ndërsa ajo po ndërtonte një karrierë gjigante. Të kesh një nënë në mes, mendoj se ka qenë një hap shumë i mirë për mua që të isha e pranishme për të. Jam shumë krenare për të dhe ishte një kujtim i bukur.”
Në fund, ajo e përmbylli duke theksuar se, pavarësisht diferencave dhe fazave të ndryshme në jetë, lidhja mes motrave mbetet e fortë:
“Jemi pa dyshim në faza të ndryshme në jetët tona, por ka gjithmonë dashuri.”
