Lidhja mes një njeriu dhe qenit të tij është shumë më e thellë sesa duket. Ajo ndërtohet mbi besimin, dashurinë dhe mirëkuptimin, ndaj nuk është çudi që psikologët besojnë se mënyra si sillemi me kafshët tona shtëpiake mund të zbulojë shumë për personalitetin dhe përvojat tona të hershme.

Qentë njihen si krijesa jashtëzakonisht intuitive. Ata arrijnë të kuptojnë kur pronari i tyre është i trishtuar, i lumtur apo i stresuar dhe shpesh reagojnë me afeksion, apo qetësi. Studime të ndryshme kanë treguar se qentë janë të aftë të lexojnë emocionet si tek njerëzit, ashtu edhe tek qentë e tjerë, duke përdorur këto sinjale për të ndërtuar sjelljen e tyre.

Por ekspertët thonë se jo çdo marrëdhënie njeri-qen është e njëjtë. Madje, mënyra si njerëzit i trajtojnë qentë e tyre mund të lidhet drejtpërdrejt me mënyrën si ata vetë janë trajtuar gjatë fëmijërisë.

Një postim viral nga Crown and Paw, një kompani e njohur për portretet e kafshëve shtëpiake, shprehej:

“Njerëzit i trajtojnë kafshët e tyre ashtu siç do të kishin dashur të trajtoheshin vetë kur ishin fëmijë.”

Sipas psikologëve, kur kujdesemi për qenin tonë me dashuri, ngrohtësi dhe përkushtim, në njëfarë mënyre po kujdesemi edhe për “fëmijën e brendshëm” brenda nesh. Për njerëzit që janë rritur me mungesë afeksioni apo neglizhencë emocionale, marrëdhënia me një qen mund të bëhet një formë shërimi emocional.

Kujdesi për një kafshë shtëpiake mëson gjithashtu sjellje të shëndetshme që mund t’i aplikojmë edhe ndaj vetes. Të ushqesh qenin, ta nxjerrësh për shëtitje, t’i krijosh një ambient të sigurt dhe ta trajtosh me butësi janë gjëra që reflektojnë edhe nevojën për të treguar kujdes ndaj vetes sonë.

Ekspertët theksojnë se elementi më i rëndësishëm në marrëdhënien me një qen është ndërtimi i besimit. Kjo arrihet përmes dashurisë, durimit, trajnimit pozitiv dhe afeksionit. Ndërsa sjellja agresive apo ndëshkimi i vazhdueshëm vetëm sa krijojnë frikë dhe pasiguri tek kafsha.

Madje, studime psikologjike kanë treguar se mizoria ndaj kafshëve mund të jetë një sinjal paralajmërues për prirje ekstreme të dhunshme edhe ndaj njerëzve.

Nga ana tjetër, një marrëdhënie e shëndetshme me një qen na ndihmon të vlerësojmë gjërat e vogla të jetës, si një shëtitje në diell, një mëngjes i qetë apo një përqafim i ngrohtë pas një dite të lodhshme.

Ndaj, mënyra si e trajtojmë qenin tonë mund të jetë pasqyra më e sinqertë e mënyrës si e shohim dashurinë, kujdesin dhe vetveten.