Në botën e modës po shfaqet një trend i ri që sfidon idenë e veshjes perfekte, quhet stili “messy”, ose ndryshe pamja paksa e çrregullt, po bëhet gjithnjë e më popullore mes yjeve dhe stilistëve.

Tradicionalisht, periudha e muajit të modës në shkurt ka qenë momenti kur personazhet e famshëm shfaqeshin me veshje të kuruara deri në detaj. Por këtë sezon duket se po ndodh e kundërta. Në vend të stilit të pastër dhe elegant, shumë të famshëm po zgjedhin një pamje më ndryshe, sikur rrobat të jenë veshur dhe përdorur prej kohësh.

Modelja Alex Consani u pa së fundmi në New York me xhinse të gjera, të grisura dhe të njollosura, duke krijuar një stil që dukej qëllimisht i pakujdesshëm. Ndërsa aktorja Odessa A’zion u shfaq në rreshtin e parë të një sfilate të Coach me një xhaketë kamoshi që dukej sikur kishte kaluar vite qëkur ishte blerë.

Edhe aktori Timothée Chalamet është bërë pjesë e këtij trendi. Ai u fotografua në Paris me një xhaketë bomber me njollë të dukshme në sup. Edhe pse dukej si një aksident, në fakt ishte pjesë e dizajnit. Xhaketa, e krijuar nga marka Adon dhe me çmim rreth 2800 paund, ishte prodhuar që të dukej e “përdorur” dhe tashmë është shitur plotësisht.

Ky stil i ri është një kundërpërgjigje ndaj trendit të mëparshëm të njohur si “quiet luxury”, i cili promovonte rroba perfekte, të pastra dhe minimaliste. Në kontrast, stili “messy” përqafon autenticitetin.

Sipas ekspertëve të modës, shumë njerëz pëlqejnë të blejnë rroba që duken të përdorura sepse ato krijojnë menjëherë ndjesinë e një historie. Shenjat e konsumimit, njollat apo gërvishtjet i japin një karakter më personal një veshjeje, edhe nëse ato janë krijuar qëllimisht nga stilistët.

Gjithsesi, ju mos u shpenzoni, thjesht mos e vini shumë shpesh lavatriçen.