Produksioni i ri i operës Il Trovatore hapi siparin në skenën e TKOBAP-së me një kast të mrekullueshëm artistësh, të cilët sollën në jetë me intensitet dhe emocion të rrallë historinë e kësaj kryevepre verdiane.
Kjo premierë shënoi një moment historik: rikthimin e tenorit të mirënjohur Josif Gjipali pas më shumë se dy dekadash në skenën shqiptare, si edhe debutimin absolut në skenën tonë të mezzosopranos Enkeleida Shkoza, një prani artistike që u mirëprit me ovacione dhe duartrokitje të shumta nga publiku.
Shkëlqimi i solistëve dhe gërshetimi i talenteve
Kasti i shkëlqyer i solistëve të TKOBAP-së — Eva Golemi, Bledar Domi, Suada Gjergji, Matias Xheli dhe Erlind Zeraliu — me profesionalizëm dhe përkushtim kontribuan në suksesin e kësaj mbrëmjeje, duke i dhënë jetë një produksioni të denjë për çdo skenë evropiane. Gjithashtu, miku i ftuar, baritoni Ankhbayar Enkhbold, solli një Conte di Luna të fuqishëm vokalist dhe skenik.
Ky sukses i jashtëzakonshëm vjen edhe si rezultat i një strategjie të qartë menaxheriale. Drejtori i TKOBAP, Z. Aulon Naçi, i ka dhënë një jetë dhe frymëmarrje të re institucionit. Nën drejtimin e tij, teatri ka pësuar një transformim rrënjësor, si për nga diapazoni i gjerë i portofolit artistik, ashtu edhe nga rritja e ndjeshme e cilësisë së veprave të vëna në skenë.
Vizioni i Z. Naçi për të ndërthurur talentet më të mira shqiptare me artistë ndërkombëtarë me famë botërore — siç u dëshmua edhe në këtë produksion — e ka vendosur TKOBAP-në në një trajektore të re ekselence, duke afruar publikun dhe duke rritur standardet artistike kombëtare.
Ana vizuale dhe muzikore
Orkestra Simfonike dhe Kori i TKOBAP-së, nën drejtimin e dirigjentit Andrea Solinas, si dhe dirigjentit të Korit, Dritan Lumshi, shoqëruan me mjeshtëri këtë premierë, duke theksuar tensionin dramatik dhe pasurinë muzikore të veprës.
Produksioni mban firmën regjisoriale të Roberto Catalano, i realizuar nën asistencën e Luca Baraccini dhe Ada Gurrës. Ata sollën në skenën e TKOBAP-së një vizion të qartë artistik dhe një gjuhë skenike bashkëkohore, plotësisht në shërbim të dramaturgjisë së veprës.
