
Aktori i njohur i roleve dytësore, James Handy, i cili u bë i njohur për paraqitjet e tij në filmat "Top Gun: Maverick" dhe "Jumanji", ka humbur jetën pas një sulmi me thikë në Los Anxhelos. Ai ishte 81 vjeç.
Sipas autoriteteve, aktori dyshohet se u vra nga djali 44-vjeçar i partneres së tij, Michael Gledhill.
Policia u thirr në një banesë në zonën e Tarzanës të mërkurën në mëngjes, pasi një person telefonoi dhe deklaroi: “Jam biri i njeriut, sapo vrava njeriun e mëkatit.”

Kur mbërritën në vendngjarje, oficerët gjetën Handy-n pa ndjenja në oborrin e përparmë të shtëpisë, me disa plagë thike në kraharor. Ai u transportua menjëherë në spital, por u shpall i vdekur pak më vonë.
Sipas policisë, pak kohë pas ngjarjes, Michael Gledhill iu afrua vetë oficerëve dhe u tha se ishte personi që ata po kërkonin. Autoritetet thanë se ai jetonte në të njëjtën banesë me nënën e tij, partneren e aktorit.
Ende nuk dihen shkaqet që çuan në sulm. Gledhill është arrestuar nën akuzën e vrasjes dhe ndaj tij është vendosur një garanci prej 2 milionë dollarësh.


James Handy e nisi karrierën si aktor në vitin 1977 dhe gjatë dekadave të punës së tij grumbulloi afro 150 role në film dhe televizion. Ai u shfaq në seriale të njohura si "Quantum Leap", "NYPD Blue", "Beverly Hills", "90210", "The X-Files", "The West Wing" dhe "Alias".


Në kinematografi ai luajti në filmat "Taps", "Arachnophobia" dhe "Logan". Publiku e kujton veçanërisht për rolin e shfarosësit të insekteve në “Jumanji”, ndërsa paraqitja e tij më e fundit në ekranin e madh ishte si banakieri Jimmy në “Top Gun: Maverick”, përkrah Tom Cruise.