Celine Dion u shfaq e lumtur dhe në gjendje të mirë shëndetësore në postimin e saj më të fundit në Instagram, ku u uroi ndjekësve një Ditë Falënderimesh të lumtur, ndërsa vazhdon betejën me sindromën e personit të ngurtë (SPS).
“Miq të dashur. Sot është një kujtesë e bukur për të ngadalësuar, për të marrë frymë thellë dhe për të falënderuar,” tha ajo në videon e publikuar të enjten, duke parë drejtpërdrejt në kamerë.
“Ka diçka shumë të fuqishme në mbledhjen me njerëzit që doni, qoftë rreth një tryeze të plotë, në telefon apo edhe thjesht në zemër.”
Ajo shtoi:
“Jam shumë mirënjohëse për familjen time dhe momentet tona së bashku që vlejnë sa bota për mua.”
Dion e bëri publike diagnozën e saj në dhjetor 2022, kur njoftoi shtyrjen ose anulimin e disa koncerteve që kishte planifikuar.
“Kam pasur probleme me shëndetin prej kohësh, dhe ka qenë shumë e vështirë për mua t’i përballoj këto sfida dhe të flas për gjithçka që po kaloj,” tha ajo në një video emocionale të postuar në rrjete sociale në atë kohë.
“Kohët e fundit më kanë diagnostikuar me një sindromë neurologjike shumë të rrallë, që prek rreth një në një milion njerëz,” shpjegoi ajo, duke theksuar se pikërisht ky çrregullim po i shkaktonte të gjithë ‘spazmat’ që kishte përjetuar.
SPS shkakton ngurtësim dhe spazma në gjymtyrët e trupit. Me kalimin e kohës, muskujt e këmbëve ngurtësohen, e më pas preken edhe muskuj të tjerë, përfshirë krahët dhe fytyrën.
Në qershor 2024, këngëtarja foli më hapur për betejën e saj gjatë një interviste me Hoda Kotb, ku tregoi sa e vështirë ishte bërë për të kënduar.
“Është sikur dikush po të mbyt,” tha fituesja e çmimeve Grammy. “Është sikur dikush po të shtyn laringun/faringun në këtë mënyrë.”
Për shkak të diagnozës, Dion anuloi edhe të gjitha datat e mbetura të turneut të saj.
