Mosmarrëveshja ligjore mes aktores Blake Lively dhe aktorit e regjisorit Justin Baldoni po hyn në një fazë të re, pavarësisht se vetëm një muaj më parë palët kishin arritur një marrëveshje jashtë gjykatës.

Të hënën, të dyja palët u paraqitën sërish në gjykatë në New York, ku ekipi ligjor i Lively-t kërkoi kompensim financiar dhe mbulimin e shpenzimeve ligjore. Sipas avokatëve të aktores, padia për shpifje e ngritur më herët nga Baldoni dhe kompania e tij, Wayfarer Studios, përbën një formë hakmarrjeje.

Nga ana tjetër, përfaqësuesit ligjorë të Baldonit i kanë hedhur poshtë këto pretendime. Sipas raportimeve, shuma e dëmshpërblimit që kërkon Lively nuk është bërë ende publike.

Konflikti nisi në fund të vitit 2024, kur Blake Lively ngriti një padi ku pretendonte se Baldoni, i cili ishte njëkohësisht regjisor i filmit It Ends With Us, kishte bërë komente të papërshtatshme për jetën e saj personale dhe kishte tentuar të ndryshonte skenarin duke shtuar skena intime që nuk ekzistonin në materialin origjinal.

Aktorja, e njohur për rolin e saj në serialin Gossip Girl, pretendoi gjithashtu se Baldoni kishte organizuar një fushatë të koordinuar në media dhe rrjetet sociale me qëllim dëmtimin e imazhit të saj publik.

Në përgjigje, Justin Baldoni dhe Wayfarer Studios ngritën një padi kundër Lively-t dhe bashkëshortit të saj, Ryan Reynolds, duke i akuzuar për shpifje. Megjithatë, gjykata vendosi të rrëzojë disa nga këto pretendime.

Gjykatësi federal Lewis Liman ka hedhur poshtë një pjesë të akuzave nga të dyja kampet, por ka lejuar që pretendimet e Lively-t për hakmarrje të vazhdojnë në procesin gjyqësor.

Ndërkohë, filmi It Ends With Us, i bazuar në romanin bestseller të Colleen Hoover, rezultoi një sukses i madh në kinema, duke gjeneruar më shumë se 350 milionë dollarë të ardhura në mbarë botën.