Një zjarr i përmasave të mëdha ka përfshirë pasditen e së martës fasadën e një pallati përballë Qendrës Spitalore “Nënë Tereza” në Tiranë, duke shkaktuar panik tek banorët dhe mbulim të zonës nga tymi i dendur. Flakët janë përhapur me shpejtësi në fasadë, ndërsa operacioni për shuarjen e tyre ka zgjatur për disa orë, teksa ende vijon.
Çfarë ndodhi?
Sipas raportimeve nga vendngjarja, zjarri ka nisur në një kompleks banimi në zonën e “5 Majit” dhe është përhapur në fasadën e pallatit, duke krijuar një situatë të rrezikshme. Edhe pse zjarrfikësit kanë ndërhyrë, flakët kanë vijuar për një kohë të gjatë për shkak të përhapjes së shpejtë dhe kushteve të vështira në terren.
Sa të lënduar ka?
Skënder Brataj, drejtori i Urgjencës Kombëtare, bëri me dije se numri i të lënduarve nga zjarri ka shkuar në 11.
Sipas tij, një nga të lënduarat është një qytetare që ka pësuar djegie në rreth 15% të trupit, por fatmirësisht ndodhet jashtë rrezikut për jetën.
"I vetmi person i shtruar për djegie plastike është një grua, me djegie 15%, jashtë rrezikut për jetën. Pesë persona janë shtruar te Toksikologjia. Ka edhe nga zjarrfikësit, por nuk e di numrin e saktë për momentin që t’jua them",- tha Brataj.
Ndërkohë, disa autoambulanca kanë qenë në gatishmëri gjatë gjithë operacionit për t’u ardhur në ndihmë banorëve dhe efektivëve në terren.
Çfarë thonë autoritetet?
Sipas Ministrisë së Mbrojtjes, në operacion janë angazhuar dhjetëra mjete zjarrfikëse dhe një numër i madh efektivësh. Në ndihmë të situatës janë përfshirë edhe bashkitë e Kamzës dhe Vorës, si dhe Forcat e Armatosura, të cilat kanë vënë në dispozicion mjete, personel dhe helikopterë të tipit Cougar për ndërhyrje nga ajri.
Ndërkohë, shkaqet e zjarrit mbeten ende të paqarta dhe pritet të hetohen.
