Foto: Hilary Duff/ Getty

Hilary Duff ka zbuluar se një nga veshjet më të njohura të filmit “The Lizzie McGuire Movie” nuk ishte aspak ndër të preferuarat e saj, pavarësisht se sot konsiderohet ikonike. Gjatë një interviste të fundit, ajo rikujtoi performancën e këngës “What Dreams Are Made Of”, një nga momentet më të famshme të filmit.

Në atë skenë, Duff shfaqet në dy role, ku si Isabella mban një kostum jeshil shumë të dallueshëm, i cili është kthyer në simbol të stilit të viteve 2000. Megjithatë, aktorja pranoi se në atë kohë nuk e pëlqente aspak këtë veshje dhe madje e urrente ta vishte.

Ajo shpjegoi se arsyeja kryesore ishte ngjyra jeshile e fortë, e cila nuk i pëlqente si adoleshente. Ndryshe nga seriali, ku kishte më shumë ndikim në zgjedhjen e veshjeve, në film vendimet merreshin kryesisht nga kostumografja, çka e bënte të ndihej më pak e përfshirë në stilin e saj.

Megjithatë, Duff theksoi se jo gjithçka nga ai look ishte negative për të. Ajo kujtoi se i pëlqente parukja kafe që përdorej për personazhin Isabella dhe vlerësoi punën e kostumografes, duke pranuar se sot e sheh me sy tjetër atë veshje.

Pavarësisht mendimit të saj në atë kohë, kostumi jeshil është kthyer në një nga veshjet më të njohura të filmit dhe një simbol i fortë i modës së viteve 2000. Ndërkohë, Hilary Duff vazhdon të rikthehet në vëmendje me projekte të reja dhe momente nostalgjike që lidhen me fillimet e karrierës së saj.