Një rast i pazakontë ka përfunduar në një gjykatë në Londër: një grua që pati marrëdhënie me dy vëllezër binjakë identikë brenda katër ditësh nuk mund ta dijë me siguri kush është babai i fëmijës së saj.
Sipas vendimit të Gjykatës së Apelit, nuk është e mundur të përcaktohet atësia, edhe pse janë kryer analizat e ADN-së. Testet konfirmojnë vetëm se babai biologjik është njëri prej binjakëve, por nuk mund të identifikohet saktësisht se cili prej tyre.
Rasti u bë publik pasi nëna e fëmijës dhe njëri nga binjakët iu drejtuan gjykatës për të rrëzuar vendimin e mëparshëm, sipas të cilit binjaku tjetër ishte regjistruar si baba në certifikatën e lindjes. Ata kërkonin që përgjegjësia prindërore t’i kalonte atij që pretendon se mund të jetë babai biologjik.
Megjithatë, gjyqtarët vendosën se kjo nuk mund të provohet. Sipas dokumenteve zyrtare, të dy vëllezërit kishin kryer marrëdhënie me gruan brenda një periudhe shumë të afërt kohore, pikërisht në muajin kur u ngjiz fëmija. Për këtë arsye, probabiliteti është i barabartë: secili prej tyre ka 50% mundësi të jetë babai.
Në vendim theksohet se aktualisht e vetmja e vërtetë që mund të pranohet është kjo: babai është njëri prej binjakëve, por nuk është e mundur të thuhet se cili.
Gjykata shtoi gjithashtu se, në të ardhmen, ka gjasa që zhvillimet e shkencës ta bëjnë të mundur identifikimin e saktë të babait, por aktualisht një analizë e tillë nuk mund të kryhet pa kosto shumë të larta.
Shën.red. Binjakët identikë vijnë nga e njëjta vezë e fekonduar që ndahet në dy embrione, ndaj ata ndajnë pothuajse 100% të materialit gjenetik. Për këtë arsye, testet standarde të ADN-së nuk arrijnë t’i dallojnë. Megjithatë, ata nuk janë plotësisht identikë: gjatë zhvillimit mund të ndodhin ndryshime shumë të vogla në nivel gjenetik dhe në mënyrën si funksionojnë gjenet. Këto dallime janë shumë të rralla dhe zakonisht nuk kapen nga testet e zakonshme. Vetëm metoda shumë të avancuara dhe të kushtueshme mund të identifikojnë këto ndryshime minimale dhe të përcaktojnë me saktësi babain.
Ndërkohë, për shkak të kësaj paqartësie, u vendos që çdo përgjegjësi prindërore e dhënë më parë të pezullohet për momentin. Sipas gjyqtarëve, nuk është në interesin më të mirë të fëmijës që të vazhdojë një situatë ku nuk dihet me siguri kush është babai.
Ky rast është një nga ato situata të rralla që tregojnë se, edhe në një kohë kur ADN-ja konsiderohet prova më e fortë shkencore, ka ende raste ku ajo nuk mjafton për të dhënë një përgjigje të qartë.
