Dhjetëra qytetarë u mblodhën në Lezhë për të nderuar kujtimin e 25-vjeçares Xhuana Nikollaj, e cila humbi jetën në rrethana tragjike. Të pranishmit ndezën qirinj dhe vendosën lule pranë fotografisë së saj, si simbolikë e një jete të ndërprerë që u shua shumë herët.

Familjarë, miq dhe banorë të qytetit shprehën sensibilizimin lidhur me këtë tragjedi, ndërsa qirinjtë dhe buqetat me lule u kthyen në simbol të dhimbjes dhe mbështetjes për familjen e të resë. Homazhet u shoqëruan me mesazhe solidariteti dhe thirrje për më shumë ndërgjegjësim.

Po ashtu, shumë qytetarë ngritën shqetësimin për dhunën ndaj grave dhe vajzave, duke theksuar nevojën për reagim më të fortë nga shoqëria dhe institucionet.

Kjo ngjarje ka rikthyer në vëmendje debatet për sigurinë dhe mbrojtjen e grave, teksa u shënua vetëm pak ditë pas Ditës Ndërkombëtare të Gruas.

Ndërkohë, lidhur me rastin, policia ka shpallur në kërkim ish-bashkëshortin e saj, Eraldo Fizi, i cili ishte kthyer nga jashtë vendit më 9 mars dhe dyshohet se ka shkuar në banesën e ish-partneres në Tiranë, duke e dhunuar rëndë.

Në orët e para të mëngjesit të 10 marsit, 25-vjeçarja dyshohet se ka konsumuar fotoksinë, duke i dhënë fund jetës, teksa në trupin e saj janë konstatuar edhe shenja dhune, ndërsa në banesë është gjetur një letër që ajo u kishte lënë familjarëve.

Xhuana Nikollaj dhe Eraldo Fizi u martuan në qershor të vitit 2025 në Lezhë, por martesa zgjati vetëm disa muaj. Media të ndryshme kanë raportuar se ish-partneri i të ndjerës nuk e ka pranuar ndarjen, ndaj edhe e ka dhunuar, duke e nxitur të kryejë aktin fatal.