Princeshë Diana njihet për kaq shumë arritje të jashtëzakonshme, që nga përkushtimi i saj si nënë, e deri te roli si figurë publike frymëzuese dhe model për miliona njerëz në mbarë botën. Qoftë duke u kujdesur për fëmijët e saj apo duke shtrënguar duart me Nënë Terezën, ajo gjithmonë rrëmbente vëmendjen e kujtdo.
Përtej ndjeshmërisë që kishte, stili i saj mbetet edhe sot e kësaj dite një ndër më të përfolurit.
Veshjet e saj të paharrueshme, brenda dhe jashtë familjes mbretërore, kanë mbetur frymëzim për breza të tërë. Ajo krijoi formula veshjeje që vazhdojnë të jenë në trend edhe sot.
Në kohën kur ishte pjesë e familjes mbretërore, stili i Dianës ishte më i rezervuar, me kostume seriozë, fustane të gjatë dhe veshje klasike, plot elegancë të përmbajtur. Por pas divorcit me Princin Charles në vitin 1996, ajo “u çlirua” nga rregullat strikte të protokollit dhe përqafoi një stil më të guximshëm, duke reflektuar individualitetin dhe fuqinë e saj të brendshme.
Çfarëdo që zgjidhte të vishte, ajo e bënte me vetëbesim dhe në mënyrën e saj të veçantë. Dhe kjo është ndoshta trashëgimia më e madhe e modës së saj: të frymëzosh të tjerët të ndihen mirë me veten, pa ndjekur rregullat e të tjerëve, por duke krijuar të vetat.
