Teatri Kombëtar i Operës, Baletit dhe Ansamblit Popullor mirëpriti për herë të parë në Shqipëri “Czech Boys – Boni Pueri”, korin e djemve me famë botërore nga Republika Çeke, të cilët sollën një performancë të jashtëzakonshme me 35 zëra të pastër dhe emocionues.
Nën drejtimin e maestro Pavel Horák dhe me shoqërimin në piano të Vartan Agopian, koncerti u shndërrua në një mbrëmje të veçantë artistike që pasuroi skenën shqiptare me një traditë të çmuar të artit koral ndërkombëtar.
Ajo që e bëri këtë mbrëmje edhe më mbresëlënëse ishte fakti se fëmijët çek performuan dhe prezantuan një pjesë të programit në gjuhën shqipe, duke krijuar një lidhje të sinqertë dhe të veçantë me publikun shqiptar. Interpretimet në shqip, të realizuara me kujdes dhe dashamirësi, u duartrokitën gjatë nga të pranishmit.
Programi i tyre përfshiu vepra nga repertori klasik dhe ai bashkëkohor koral, të interpretuara me profesionalizmin dhe pastërtinë vokale që e karakterizon këtë ansambël të njohur ndërkombëtarisht. Kjo mbrëmje shënoi një premierë absolute në Shqipëri, duke qenë hera e parë që “Boni Pueri” ngjitej në skenën e TKOBAP-së.
Për Teatrin Kombëtar të Operës dhe Baletit, ky bashkëpunim përfaqëson një hap të rëndësishëm drejt sjelljes së grupeve të njohura ndërkombëtare për publikun shqiptar, duke theksuar rolin e institucionit si një qendër e rëndësishme kulturore në rajon.
Koncerti u prit me entuziazëm të madh dhe u vlerësua si një nga momentet më të veçanta të sezonit artistik, duke i dhuruar publikut shqiptar një përvojë të rrallë muzikore dhe kulturore.
