Kaos pas triumfit të PSG-së, qindra të arrestuar në Francë
Festimet për fitimin e trofeut të dytë të Champions League nga PSG u shoqëruan me tensione dhe incidente në disa qytete të Francës. Sipas autoriteteve franceze, qindra persona u ndaluan pas përplasjeve që shpërthyen gjatë natës së së shtunës.
Mijëra tifozë dolën në rrugë menjëherë pas fitores së skuadrës pariziene në finalen e luajtur në Budapest. Ministria e Brendshme bëri të ditur se 457 persona u arrestuan në mbarë vendin, ndërsa 283 prej tyre vetëm në Paris. Raportohet se një grup tentoi edhe të sulmonte një komisariat policie në kryeqytet. Autoritetet vijojnë hetimet për incidentet, ndërsa masat e sigurisë janë shtuar në zonat më të prekura nga trazirat.
SHBA ndalon një anije që tentoi të thyejë bllokadën ndaj porteve iraniane
Ushtria amerikane njoftoi se ka ndaluar një anije mallrash që po përpiqej të hynte në një port iranian, duke sfiduar bllokadën e vendosur nga Uashingtoni. Sipas Komandës Qendrore të SHBA-së, anija me flamur të Gambias kishte injoruar më shumë se 20 paralajmërime.
Forcat amerikane goditën dhomën e motorit të anijes me një raketë, duke e lënë atë të bllokuar në Gjirin e Omanit. Deri më tani, anija nuk është marrë nën kontroll nga ushtria amerikane. Ngjarja vjen në një moment tensionesh të vazhdueshme mes SHBA-së dhe Iranit, ndërsa përpjekjet diplomatike për t'i dhënë fund konfliktit mbeten të pasigurta. Sipas ushtrisë amerikane, kjo është anija e gjashtë që ndalohet teksa përpiqej të thyente bllokadën.
Partia Laburiste fiton për herë të katërt radhazi zgjedhjet në Maltë
Partia Laburiste në Maltë ka siguruar një mandat të katërt radhazi në pushtet, sipas rezultateve paraprake të publikuara pas numërimit të mostrave të votave. Fitorja i jep kryeministrit, Robert Abela, një tjetër mandat për të drejtuar vendin.
Mbështetja e votuesve është lidhur kryesisht me performancën ekonomike të Maltës, e cila vitin e kaluar regjistroi rritjen më të lartë ekonomike në Bashkimin Evropian. Vendi ka inflacion të ulët, papunësi minimale dhe ndër çmimet më të lira të energjisë në Europë. Qeveria e Abela-s ka theksuar se ka arritur të mbrojë ekonominë kombëtare nga pasojat e krizave ndërkombëtare, përfshirë tensionet në Lindjen e Mesme.
Rusia sulmon Ukrainën me mbi 200 dronë, Kievi kundërpërgjigjet
Një valë e re sulmesh ajrore ruse goditi Ukrainën gjatë natës së së dielës, me më shumë se 200 dronë të lëshuar drejt objektivave ukrainase. Forcat Ajrore të Ukrainës deklaruan se shumica e tyre u neutralizuan nga mbrojtja.
Sipas autoriteteve ukrainase, 14 dronë arritën të godasin 11 lokacione të ndryshme. Në rajonin e Chernihivit, një sulm shkaktoi vdekjen e një 58-vjeçari dhe shkatërroi shtatë kamionë pas një zjarri të madh. Në përgjigje të sulmeve ruse, ushtria ukrainase kreu goditje ndaj infrastrukturës strategjike të naftës në territorin rus. Përplasjet mes dy palëve vazhdojnë, ndërsa nuk ka ende sinjale për një ulje të tensioneve në front.
