Jasveen Sangha, e njohur si “Mbretëresha e ketaminës”, u dënua të mërkurën me 15 vite burg pasi pranoi se i kishte shitur një dozë fatale ketamine aktorit Matthew Perry. Ajo ishte e pesta nga të pandehurit që pranoi fajësinë në këtë çështje dhe mori dënimin më të ashpër, ndërsa prokurorët federalë kërkuan pikërisht këtë masë për shkak të rolit të saj në vdekjen e aktorit dhe të një personi tjetër, duke theksuar “shtrirjen e gjerë të aktivitetit të paligjshëm dhe reagimin e saj të ftohtë ndaj pasojave fatale”.
Sangha, e cila rrezikonte deri në 65 vite burg, i tha gjykatës se ndiente turp për veprimet e saj. Ajo pranoi se nuk bëhej fjalë për gabime të thjeshta, por për vendime të rënda që “kanë shkatërruar jetët e njerëzve dhe të familjeve të tyre”.
Matthew Perry ndërroi jetë në moshën 54-vjeçare në tetor 2023 dhe autoritetet përcaktuan se shkaku kryesor ishte ketamina, një anestezik që përdoret në mjekësi. Aktori, i cili kishte vite që përballej me varësinë, e kishte përdorur më parë këtë substancë në mënyrë të ligjshme për trajtimin e depresionit. Megjithatë, pasi mjeku i tij refuzoi t’i jepte sasinë që kërkonte, ai iu drejtua burimeve të tjera të paligjshme.
Në total, pesë persona u akuzuan për përfshirje në këtë rast: dy mjekë, Salvador Plasencia dhe Mark Chavez; asistenti i aktorit, Kenneth Iwamasa, i cili i injektoi drogën para vdekjes; një i njohur i tij, Erik Fleming; dhe vetë Sangha. Edhe pse mjekët nuk furnizuan dozën fatale, një gjykatës theksoi se ata kontribuan në përkeqësimin e situatës duke ushqyer varësinë e aktorit.
Sangha, 42 vjeç, pranoi se i kishte furnizuar Perry-t rreth 50 shishe ketaminë para vdekjes së tij, ndërsa asistenti vepronte si ndërmjetës. Në marrëveshjen e pranimit të fajit, ajo gjithashtu deklaroi se që prej vitit 2019 shpërndante droga, përfshirë ketaminë dhe metamfetaminë, nga shtëpia e saj në North Hollywood. Ajo pranoi se i kishte shitur ketaminë edhe një 33-vjeçari, Cody McLaury, i cili vdiq në vitin 2019 pak pasi e kishte blerë substancën prej saj, dhe se kishte vazhduar aktivitetin edhe pasi kishte marrë vesh për këto vdekje.
Prokuroria theksoi se veprimet e saj tregojnë mungesë të plotë ndjeshmërie dhe respekti për jetën, duke zgjedhur përfitimin financiar mbi njerëzit dhe duke shkaktuar dhimbje të madhe për familjet e viktimave. Sipas tyre, ajo vjen nga një sfond i privilegjuar, ka ndjekur një universitet të respektuar dhe ka marrë një diplomë masteri, por zgjodhi të merrej me trafik droge për arsye fitimi dhe statusi.
Nga ana tjetër, mbrojtja argumentoi se Sangha pranoi përgjegjësinë dhe nuk minimizoi veprimet e saj. Ajo përfaqësohej nga avokatë të njohur dhe sipas tyre nuk kishte precedent penal, ndërsa gjatë kohës në paraburgim kishte ndjekur programe rehabilitimi dhe ishte përfshirë në proces rikuperimi. Mbrojtja kërkoi lirimin e saj me kohën e kryer, duke theksuar përpjekjet për ndryshim dhe rrezikun e ulët për rikthim në krim.
Familjarët e Matthew Perry kërkuan dënimin maksimal, duke theksuar se dhimbja që kanë përjetuar është e pakthyeshme. Njerka e aktorit e cilësoi Sangha-n si një person pa ndjenja dhe kërkoi që ajo të mos ketë mundësi të dëmtojë familje të tjera. Ndërsa njerku i tij, gazetari Keith Morrison, tha se familja jeton çdo ditë me një dhimbje të thellë, duke kujtuar se aktori kishte një energji dhe talent të rrallë dhe meritonte të kishte edhe shumë kapituj të tjerë në jetën e tij.
