Brad Pitt po përjeton një humbje të madhe familjare. Nëna e tij, Jane Etta Pitt, ka ndërruar jetë në moshën 84-vjeçare, siç u bë e ditur nga mbesa e aktorit, Sydney Pitt, përmes një postimi të ndjerë në Instagram.
“Ne ende nuk ishim gati të të linim të shkoje, por mendimi se tani je e lirë të këndosh, të kërcesh dhe të pikturosh sërish e bën dhimbjen pak më të lehtë,” shkroi ajo, duke shtuar se gjyshja e saj “i donte të gjithë pa kushte”.
Jane Pitt, lindur në Memphis në vitin 1940, ishte mësuese në shkollë fillore dhe e njohur për shpirtin e saj artistik. U njoh me bashkëshortin, William Pitt, në universitetin Oklahoma Baptist, dhe së bashku rritën tre fëmijët e tyre, Brad-in, Doug-un dhe Julie-n, në Springfield, Missouri. Familja e kujton Jane-in si një artiste të talentuar, e cila përmes pikturës krijoi kujtime të paharrueshme me 14 nipërit dhe mbesat e saj.
Brad, që e ka përmendur shpesh marrëdhënien me nënën, i ka kushtuar asaj disa momente të bukura publike ndër vite. Vetëm pak muaj më parë, gjatë një interviste në “Today Show”, ai i dha një përshëndetje live:
“Mami im e ndjek këtë emision çdo mëngjes. Të dua, Jane Pitt!”, tha aktori duke buzëqeshur e duke i dërguar një puthje.
Brad Pitt e ka përshkruar shpesh nënën e tij si shumë të dashur dhe të kujdesshme. Siç mbesa e saj tha, Jane ishte një nënë, gjyshe dhe grua me shpirt të madh, që la pas një trashëgimi dashurie dhe kujtimesh për gjithë ata që e njohën.
