Në një periudhë kur rrjetet sociale po rikthejnë në fokus standardet ekstreme të dobësisë përmes trendit të njohur si SkinnyTok, Hilary Duff po dërgon një mesazh krejtësisht ndryshe. Aktorja dhe këngëtarja amerikane ka folur hapur për marrëdhënien e saj me trupin, duke theksuar se sot synimi i saj nuk është të jetë më e vogël, por më e fortë.

Duff u rrit nën dyrin e publikut në një kohë kur industria ushtronte presion të madh mbi vajzat e reja për të qenë sa më të dobëta. Ajo ka treguar më parë se në moshën 17-vjeçare u përball me një çrregullim të të ngrënit, si pasojë e pritshmërive të larta dhe komenteve të vazhdueshme për pamjen e saj.

Me kalimin e viteve, veçanërisht pasi u bë nënë, Duff ka ndryshuar mënyrën se si e sheh trupin e saj. Në vend që të ndjekë standarde të paarritshme bukurie, ajo është fokusuar te shëndeti, forca dhe mirëqenia.

Në një intervistë të fundit, Hilary tha se sot dëshiron të jetë “më e fortë, jo më e vogël”. Ajo kujtoi se është rritur në një epokë kur "në modë" ishte një trup sa më i hollë, ndërsa tani e vlerëson forcën fizike dhe muskujt që dikur e bënin të ndihej në siklet.

Sipas saj, të pasurit një trup të fortë nuk është diçka për t’u fshehur, por një arsye për t’u ndier krenare. Kjo qasje pasqyron edhe një ndryshim më të gjerë që po ndodh në botën e mirëqenies dhe fitness-it.

Gjithnjë e më shumë ekspertë po theksojnë rëndësinë e ndërtimit të masës muskulore dhe jo vetëm humbjen e kilogramëve. Muskujt luajnë një rol të rëndësishëm në metabolizëm, ndihmojnë në kontrollin e niveleve të sheqerit në gjak dhe mbështesin shëndetin e kockave, veçanërisht me kalimin e viteve.

Për këtë arsye, shumë gra po orientohen drejt aktiviteteve si stërvitja me pesha, Pilates me rezistencë dhe programe të fokusuara te forca, duke e zhvendosur vëmendjen nga pesha në peshore te ndjesia e mirë dhe funksionimi i shëndetshëm i trupit.

Mes rikthimit të trendeve që promovojnë dobësinë ekstreme, mesazhi i Hilary Duff vjen si një kujtesë se shëndeti dhe forca kanë më shumë vlerë sesa përpjekja për t’iu përshtatur standardeve të momentit.