Pamela Anderson është identifikuar prej dekadash me flokët bjonde që u bënë simbol i saj që nga koha në serialin Baywatch. Me përjashtim të një periudhe të shkurtër në vitin 2013, kur provoi ngjyrën kafe, ajo nuk kishte ndryshuar kurrë pamjen në mënyrë kaq drastike, deri tani.
Në paraqitjen e saj më të fundit, gjatë festës së Conde Nast në kuadër të Javës së Modës në Paris, Anderson i habiti të gjithë me një transformim: flokë të kuq dhe të çrregullt.
Dy vite më parë, në të njëjtin event në Paris, Pamela Anderson u bë kryefjalë e mediave pasi u shfaq pa grim, duke sfiduar normat e industrisë së bukurisë dhe duke frymëzuar shumë gra në mbarë botën.
Tani, ajo rikthehet në qendër të vëmendjes me këtë pamje të re që, sipas burimeve ndërkombëtare, është frymëzuar nga yjet suedezë të kinemasë, Gunnel Lindblom dhe Bibi Andersson, figura të njohura nga filmat e Ingmar Bergman.
Stilisti i flokëve John Nollet është ai që qëndron pas këtij transformimi të ri të Anderson. Nuk dihet ende nëse ky ndryshim është një zgjedhje personale apo lidhet me projektin e saj të ardhshëm kinematografik. Pak muaj më parë u njoftua se Anderson do të luajë përkrah Steve Coogan, në debutimin si regjisor të Michael Cera-s, në filmin Love Is Not The Answer.
